Ադրբեջանի նախագահ Իլհամ Ալիևը տեղական հեռուստաալիքներից մեկին տված հարցազրույցում սպառնացել է, թե իրենք կվերադառնան Զանգեզուր՝ ուզո՞ւմ է դա Հայաստանը, թե՞ ոչ:
«Զանգեզուրի միջանցքի ստեղծումը լիովին համապատասխանում է մեր ազգային, պատմական և ապագա շահերին: Մենք կիրականացնենք Զանգեզուրի միջանցքը՝ ուզո՞ւմ է դա Հայաստանը, թե՞ ոչ: Եթե ուզում է, մենք այդ հարցը ավելի հեշտ կլուծենք, եթե չի ուզում, մենք դա կլուծենք ուժով,- ասել է Ալիևը: – Ինչպես ասում էի նախքան պատերազմը և պատերազմի ընթացքում, նրանք պետք է իրենց կամքով հեռանան մեր տարածքներից, կամ մենք նրանց կվռնդենք ուժով: Այդպես էլ եղավ: Այդպիսին կլինի նաև Զանգեզուրի միջանցքի ճակատագիրը»:
Ալիևը նշել է, որ իրենց գլխավոր թշնամին ժամանակն է, քանի որ երկաթուղու, ավտոճանապարհի կառուցումը ժամանակ է պահանջում: Ուստի, նրա խոսքով, այդ նախագծի իրականացման համար մոբիլիզացվել են բոլոր ուժերը: «Այդպիսով, ադրբեջանցի ժողովուրդը կվերադառնա Զանգեզուր, որը մեզնից խլել էին 101 տարի առաջ»,- ասել է նա:
Պատրաստեց Վիկտորյա ԱՆԴՐԵԱՍՅԱՆԸ
