Մարտակերտում Հայաստանի ագրարային համալսարանի Շուշիի մասնաճյուղի ուսանողների ու դասախոսների կողմից հիմնադրվել էր ապրիլյան պատերազմի հերոսների հիշատակին նվիրված «Զինվորիս այգին», որտեղ 2017-ին են ծառատունկ կազմակերպել, բայց այցելում են ամեն տարի՝ խնամում, ջրում, չորացած ծառերի տեղը նոր ծառ տնկում։
Տղաների անունը կրող ծառերը փարթամանում ու հասակ են առնում` ամուր կառչելով մայր հողին։ Ծառերի արմատները մխրճվելով հողի մեջ՝ խորհրդանշում են հերոսների սխրանքը, որոնք հող հայրենին կյանքի գնով պաշտպանեցին։
Ուսանողներն ասում են` դա ամենաքիչն է, որ իրենք կարող են անել։
Համալսարանականները որոշել են, որ ստացված բերքից պետք է բաժին հասցնեն նաեւ որդեկորույս ծնողներին, քանի որ պտուղն այս դեպքում խորհրդանշում է տղաների կյանքի շարունակականությունը։
Կարդացեք նաև
Այգու խնամքին նաեւ մասնակցեցին զինվորներ, որոնք մեծ հպարտությամբ ու պատասխանատվությամբ են շարունակում հերոսացած տղաների գործը` անմնացորդ նվիրվելով հայրենիքի պաշտպանությանն ու շենացմանը։
Սերժանտ Արման Արմենակյանը, որը 44-օրյա պատերազմի ժամանակ ցուցաբերած խիզախության համար արժանացել է «Մարտական խաչ» 2-րդ աստիճանի շքանշանի, վերցնում է Արցախի հերոս Ռոբերտ Աբաջյանի անունով հուշաքարը եւ ամրացնում ծառի կողքին` հպարտանալով, խորհելով եւ հետ նայելով։ Ճանաչում էր Ռոբերտին ու պատերազմի ժամանակ միշտ նրան էր հիշում։
Վովա ԱՐԶՈՒՄԱՆՅԱՆ
«Առավոտ» օրաթերթ
20.04.2021
