Հարգելի նախագահող,
հարգելի գործընկերներ,
նախ եւ առաջ ուզում եմ շնորհակալություն հայտնել իմ գործընկերներին զեկույցների համար եւ նշել, որ ինձ համար պատիվ է ուղերձ հղել այս հարգելի լսարանին:
Նախորդ տարին չափազանց բարդ էր բոլորիս համար: Մենք ստիպված էինք պայքարել համավարակի դեմ եւ դեռ միասնական պայքար ենք մղում հաղթահարելու այն բոլոր մարտահրավերները, որոնց բախվում ենք մինչ օրս:
Կարդացեք նաև
Դժբախտաբար, անցյալ տարի Հայաստանը ստիպված էր պայքարել երկու ճակատով. մեկը՝ անտեսանելի մահացու վարակի դեմ, իսկ մյուսը իրական պատերազմում՝ Արցախը պաշտպանելու համար:
Ադրբեջանը սանձազերծեց ագրեսիա Արցախի եւ նրա ժողովրդի նկատմամբ համավարակի ընթացքում՝ Թուրքիայի եւ Թուրքիայի աջակցությամբ օտարերկրյա ահաբեկիչների անմիջական ներգրավմամբ, անտեսելով ՄԱԿ-ի Գլխավոր քարտուղարի հրատապ կոչին՝ աշխարհի բոլոր անկյուններում համաշխարհային հրադադար հաստատելու եւ համամարդկային վտանգի չեզոքացման վրա կենտրոնանալու մասին:
Հակառակ միջազգային հանրության կոչերին, Ադրբեջանը, կարծես, առիթից օգտվեց:
Պատերազմն ակնհայտորեն շատ բացասական ազդեցություն ունեցավ COVID-19 դեպքերի աճի վրա: Վիճակագրությունը ցույց է տալիս, որ պատերազմը հանգեցրեց ակտիվ դեպքերի աճի մինչեւ 400%, ինչը 5 անգամ գերազանցում է պատերազմից առաջ եղած արդյունքները: Չափազանց խոսուն է, որ պատերազմի ընթացքում Ադրբեջանը Լեռնային Ղարաբաղի մայրաքաղաք Ստեփանակերտի կենտրոնական հիվանդանոցի վրա օգտագործեց գերճշգրիտ բալիստիկ հրթիռներ:
Ադրբեջանը միշտ ունեցել է ցեղասպան եւ ֆաշիստական գաղափարախոսություն եւհայտնի է մարդու իրավունքների վատ ցուցանիշներով, նույնիսկ առանց իր ռազմական հանցագործությունների եւ միջազգային մարդասիրական իրավունքի խախտումների ընդարձակ ցուցակի: Մինչ օրս Ադրբեջանի կառավարությունը հրաժարվում է պահպանել Հայաստանի վարչապետի, Ռուսաստանի եւ Ադրբեջանի նախագահների կողմից 2020 թ. նոյեմբերի 9-ին ստորագրված հրադադարի հայտարարության պայմանները, համաձայն որի՝ «Տեղի է ունենում ռազմագերիների, պատանդների եւ պահվող այլ անձանց ու մահացածների մարմինների փոխանակում»: Այնուամենայնիվ, Ադրբեջանի կառավարությունը հրաժարվում է ազատել հայ ռազմագերիներին եւ մինչ օրս հերքում է նրանց գոյությունը: Մենք հայցում ենք ձեր ուշադրությունը այս կապակցությամբ եւ կոչ ենք անում Եվրանեսթին հետեւել ատելության քարոզին եւ հայերի նկատմամբ անհանդուրժողականության դրսեւորման դեպքերին, ներառյալ` բարձրագույն քաղաքական մակարդակում:
Կցանկանայի շեշտել, որ մեր պատվիրակությունը գնահատում է բազմաբնույթ համագործակցությունը, եւ կարծում եմ, որ համատեղ ջանքերով կկարողանանք միասին հաղթահարել բազմաթիվ մարտահրավերներ:
Վերջում ուզում եմ շնորհակալություն հայտնել ԵՄ-ին եւ Եվրանեսթ ԽՎ-ին՝ արդյունավետ համագործակցության համար եւ հավաստիացնել, որ մեր պատվիրակությունը պատրաստ է արդյունավետ եւ հուսալի համագործակցության:
Շնորհակալություն ուշադրության համար:
