«Վտանգավոր են նաեւ թրքասեր հայերը։ Այսօր իշխանության եւ պաշտոնյաների կողմից թրքասիրության կոչեր ենք տեսնում, խաղաղ գոյակցության եւ Թուրքիայի հետ համագործակցության մասին ակնարկներ՝ այն դեպքում, երբ կորցրել ենք հայրենիքի՝ Արցախի մի մասը»,-ՀՀ գիտությունների ազգային ակադեմիայի կազմակերպած՝ «Հայոց ցեղասպանություն. Թուրքիայի պատասխանատվությունը երեկ և այսօր» թեմայով քննարկման ժամանակ այսօր հայտարարեց պատմաբան Էդիկ Մինասյանը։
Նրա բնորոշմամբ՝ Էրդողանի եւ Ալիեւի վերջին շրջանի հոխորտանքները վկայում են, որ Թուրքիան երբեք չի հրաժարվի իր ձգտումներից, իսկ մենք դրան հակադրում ենք խաղաղասիրական կոչերը․ «Միաժամանակ՝ թրքասիրական արտահայտություններ ենք թույլ տալիս։ Դրանց տեղը չէ եւ ժամանակը չէ։ Սահմանների բացում եւ տնտեսական շահ են հետապնդում, մինչդեռ դա ավելի շատ վնաս կբերի։ Պարտվողական հոգեբանությունը շարունակվում է։ Այսօր նահանջ ենք անում խաղաղասիրական կոչերով։ Իհարկե, պետք է նորմալ հարաբերություններ հաստատել, բայց Թուրքիան ագրեսիվ պահվածք է դրսեւորում եւ մեր օրերում եւս ցեղասպանություն իրականացնում»։
Լուիզա ՍՈՒՔԻԱՍՅԱՆ
