Քիչ առաջ Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստի ընթացքում վեհաժողովը ձայների 93 կողմ, 21 դեմ, 18 ձեռնպահ հարաբերակցությամբ հաստատեց հայ ռազմագերիների հարցով ընթացիկ հարցերի քննարկում անցկացնելու մասին՝ ԵԽԽՎ-ում հայկական պատվիրակության պահանջը: Քննարկումը տեղի կունենա երեքշաբթի՝ ապրիլի 20-ին, կեսօրին՝ ԵԽԽՎ լիագումար նիստի ընթացքում:
Ինչպես արդեն տեղեկացրել ենք հայկական պատվիրակությունն ընթացիկ հարցերի շրջանակում ԵԽԽՎ օրակարգում առաջարկել էր ներառել նաև հայ ռազմագերիների հարցը:
Այս անգամ ի տարբերություն ձմեռային նստաշրջանի հայկական պատվիրակության պահանջը չմերժվեց: Մինչ քվեարկությունը ձայնի իրավունք խնդրեց ԵԽԽՎ-ում ադրբեջանական պատվիրակության ղեկավար Սամադ Սեիդովը: Նա հայտարարեց, թե նման քայլերով հայկական պատվիրակությունը խոչընդոտում է Ադրբեջանի՝ խաղաղության հաստատմանն ուղղված ջանքերին: Եվ նշեց, որ նման քննարկումը միայն բացասական ազդեցություն կունենա:
Կարդացեք նաև
ԵԽԽՎ նախագահ Հենդրիկ Դամսն ի պատասխան հիշեցրեց՝ ԵԽԽՎ Բյուրոն կողմ է քվեարկել այս առաջարկին:
Նշենք, որ ընթացիկ հարցերի քննարկում կկազմակերպվի նաև COVID-19 պատվաստումների հարցով: Երկու հարց էլ՝ Ալեքսեյ Նավալնիի ձերբակալումը և կալանավորումը, Թուրքիայում ժողովրդավարական ինստիտուտների գործունեությունը, կքննարկվի հրատապ ընթացակարգով՝ հինգշաբթի օրը:
Տաթև ՀԱՐՈՒԹՅՈՒՆՅԱՆ
