«Եթե այդ հանձնաժողովը հիմա ստեղծվի, այն պետք է ղեկավարի Անդրանիկ Քոչարյանը, որովհետեւ 11 հոգուց 7-ը պետք է լինեն «Իմ քայլականներ»,-խորհրդարանում լրագրողների հետ զրույցում այսօր ասաց «Լուսավոր Հայաստան» խմբակցության պատգամավոր Գեւորգ Գորգիսյանը՝ անդրադառնալով լիազորությունները դադարեցված ԳՇ պետ Օնիկ Գասպարյանի՝ 44-օրյա պատերազմի հանգամանքներն ուսումնասիրող ԱԺ քննիչ հանձնաժողով ստեղծելու առաջարկին։
«Իմիջիայլոց, վստահ չեմ, որ պաշտոնապես նամակ ենք ստացել։ Մեր առաջարկը պարիտետային հանձնաժողով ստեղծելն էր։ Դա մերժվեց Նիկոլ Փաշինյանի կողմից։ Այն մարդիկ, որոնք պատերազմի ընթացքում սատարել են վարչապետի գործողություններին, շահագրգիռ չեն լինի, որպեսզի որեւէ բան բացահայտվի։ Իշխանափոխությունից հետո կստեղծենք պարիտետային հանձնաժողով։ Պարոն Օնիկ Գասպարյանի հետ որեւէ բան չենք քննարկել»,-նշեց Գեւորգ Գորգիսյանը։
Լուիզա ՍՈՒՔԻԱՍՅԱՆ
