Այսպիսով, ԲԴԽ նախագահ Ռուբեն Վարդազարյանի նկատմամբ հարուցվել է ՀՀ Քր․ օրենսգրքի 332 հոդվածի 3-րդ մասի հատկանիշներով քրեական գործ՝ «արդարադատությանը միջամտել»։ Գործը հարուցված է մեկ անձի՝ նախկին դատավոր, այժմ ԱԱԾ տնօրենի տեղակալ Անդրանիկ Սիմոնյանի տրված ցուցմունքով ։ Ծափահարություններ․․․
Հիշեցում․
2018թ․ գաղտնազերծվեցին վարչապետ Նիկոլ Փաշինյանի, ԱԱԾ տնօրեն Արթուր Վանեցյանի և ՀՔԾ պետ Սասուն Խաչատրյանի հեռախոսազրույցները, որոնցում բացահայտ խոսվում էր դատավորներին կալանքի, գրավի, նույնիսկ գրավի չափի մասին հանձնարարականների մասին։ Սակայն «հայրենի, պրոֆեսիոնալ, անկախ» իրավապահ մարմինները, հատկապես դատախազությունը, դրանց մեջ հանցակազմ՝ արդարադատությանը միջամտություն չտեսավ և գործերը կարճվեցին։
Այս՝ 2021թ․ բացահայտվեցին վարչապետի խորհրդական Աննա Վարդապետյանի ուղղորդումներն ու հանձնարարականները քննչական մարմիններին, քրեական գործեր թխելու մասին։ Եվ այստեղ նույնպես, արդարադատության ոչ միայն միջամտություն չգտնվեց, ապա չեմ զարմանա, որ այն գնահատվի, որպես արդարադատությանն աջակցող քայլ և քր․ գործ հարուցվի պաշտպանի նկատմամբ, նույն հոդվածով։
Կարդացեք նաև
Իրականում բոլորն են հասկանում, որ վարչապետը իր մոտ է կանչել իրեն ենթակա կառույցների ղեկավարներին և հանձնարարել շտապ գործ թխել իրեն չենթարկվող ԲԴԽ նախագահի դեմ, ինչպես հանձնարարել էր, 2019թ․ դատավոր Դավիթ Գրիգորյանի և ՍԴ նախագահ Հրայր Թովմասյանի դեմ գործեր թխելը։
Պատկերացնում եմ, թե ինչպիսի հավատարմությամբ վարչապետին կծառայի ԲԴԽ նոր պետ Գագիկ Ջհանգիրյանը, քանի որ նրա դեմ գործեր հարուցելու համար հատուկ ջանքեր գործադրելու անհրաժեշտություն չեն առաջանա և նա սա շատ լավ գիտի։
ԵՎ ինչպես միշտ, մեր առաջադեմ հանրությունը, իրավապաշտպանները, որոնք անգիր արած արտասանում են «իրավական պետություն, իշխանությունների տարանջատում, դատարաների անկախություն, արդար դատավարություն» արտահայտությունները, այս ամենը տեսնելով՝ լռում են, իսկ ներքուստ ողջունում։
Ավետիք ԻՇԽԱՆՅԱՆ
