«2,5 տարի այստեղից վարչապետին պարբերաբար հարցրել եմ՝ 2018թ․-ին հայտնաբերված աշխատատեղերից ամեն մեկից հազար դրամ պետք է գար զինծառայողների ապահովագրության հիմնադրամին։ 53 000 աշխատատեղի դեպքում ամսական 53 միլիոն․․․անցած տարվա նոյեմբերին այդ գումարը հասել էր երեք միլիարդի, սակայն գումարները չկային, չէին արտացոլվում պաշտոնական հաշվետվություններում»,-ԱԺ նիստում այսօր ՀՀ կառավարության ծրագրի 2020թ․-ի կատարման տարեկան զեկույցի քննարկման ժամանակ ՀՀ փոխվարչապետ Մհեր Գրիգորյանին ասաց անկախ պատգամավոր Տիգրան Ուրիխանյանը։
Հիշեցնենք, որ վարչապետ Նիկոլ Փաշինյանն ասել էր, թե հեղափոխությունից հետո ստեղծվել կամ ստվերից դուրս է եկել մոտ 50 000 աշխատատեղ, Տիգրան Ուրիխանյանն էլ պարբերաբար բարձրաձայնել է, թե ուր են անհետանում այդ աշխատատեղերից հիմնադրամին հատկացվելիք ամսական վճարները։
Տիգրան Ուրիխանյանը Մհեր Գրիգորյանին ասաց․ «Այս հարցը շատ բարձրաձայնելու արդյունքում կառավարության որոշմամբ ինձ հանեցին հիմնադրամի հոգաբարձուների խորհրդի կազմից, հիմնադրամն էլ ինձ դատի տվեց ու պարտվեց։ Պահանջում էր չհարցնել, թե որտեղ է այդ գումարը, որովհետեւ դա իբր վարկաբեկում էր հիմնադրամին։ Հիմա էլի հարցնում եմ՝ ո՞ւր է ժողովրդի փողը։ Դուք երկրի ղեկավարի տեղակալն եք, տեղեկություն ունե՞ք։ Կա՞ն այդ փողերը, վերջապես հայտնվե՞լ են»։
Կարդացեք նաև
Ի պատասխան փոխվարչապետը միայն նշեց․ «Հիմնադրամում բարեփոխումներ են իրականացվել, կառավարման մոդելն է փոխվել։ Համարեցինք, որ հիմնադրամը պետք է ավելի պրոֆեսիոնալ ձեւով կառավարվի։ Խորհրդի ձեւավորման կարգը եւս փոխվել է։ Ինչ վերաբերում է ֆինանսական միջոցներին, անպայման ուշադիր կլինեմ, հետաքրքիր բան եք ասում։ Անկեղծ՝ չեմ հիշում դրվագ, որ պակասորդի տպավորություն լիներ»։
Լուիզա ՍՈՒՔԻԱՍՅԱՆ
