«Ադրբեջանի հետ գերիների վերադարձի գրավոր պայմանավորվածություն կա, որը ստորագրվել է նոյեմբերի իննին։ Այն ուժի մեջ է ամեն պահի։ Արձանագրենք, որ Ադրբեջանը չի կատարում իր պարտավորությունը»,-կառավարություն-ԱԺ հարցուպատասխանի ժամանակ այսօր հայտարարեց ՀՀ վարչապետ Նիկոլ Փաշինյանը՝ անդրադառնալով հայ ռազմագերիների վերադարձի խնդրին։
«Լուսավոր Հայաստանի» պատգամավոր Անի Սամսոնյանը նրանից հետաքրքրվել էր՝ ինչո՞ւ տապալվեց ապրիլի ութին հայ ռազմագերիների վերադարձը, ինչո՞ւ ինքնաթիռը դատարկ եկավ։
Փաշինյանը պատասխանեց․ «Այո, ես տեսնում եմ, որ Ադրբեջանի իշխանությունն այս հարցը դարձնում է քաղաքական շահարկման առարկա, այդ թվում ՀՀ-ում ներքաղաքական ապակայունություն հրահրելու, որոշ ուժերի համար խոսափող եւ հարթակ դառնալու համար։ Դուք շարունակաբար այդ փոխանցումը վերցնում եք ու իրագործում»։
Փաշինյանը վստահեցրեց՝ չկա մի օր, որ ՀՀ ներկայացուցիչները չզբաղվեն գերիների եւ անհետ կորածների հարցերով։
Կարդացեք նաև
Անի Սամսոնյանը պնդեց՝ եղել է պաշտոնական հայտարարություն, որ գերիներ են վերադառնալու, ինչո՞ւ այդպես չեղավ, ո՞վ է պատասխանատու դրա համար, ինչո՞ւ վարչապետի խոսնակը կամ փոխվարչապետի խոսնակը չեն ազատվել աշխատանքից։ «Այսուհետ ընդդիմությանը չմեղադրեք դրա համար։ Այդ դուք եք PR անում գերիների հարցի վրա եւ աշխարհի առաջ մեզ խայտառակ անում»,-հավելեց Սամսոնյանը։
Նիկոլ Փաշինյանը պատասխանեց․ «Պատասխանատվությունը կրելու է Ադրբեջանի նախագահը, որը ստանձնել է պարտավորությունները եւ չի կատարում դրանք»։
Լուիզա ՍՈՒՔԻԱՍՅԱՆ
