Երևանի պետական համալսարանի տնտեսագիտության ֆակուլտետի կառավարման և գործարարության ամբիոնի վարիչ Կառլեն Խաչատրյանը լրագրողների հետ զրույցում անդրադառնալով ԵՊՀ հոգաբարձուների խորհրդի` կառավարության եւ ԿԳՄՍ նախարարության կողմից ներկայացված 15 անդամների հրաժարականներին՝ նշեց. «Ակնհայտ է, որ սա կազմակերպված է կառավարության եւ լիազոր մարմնի կողմից, որովհետեւ հրաժարականի դիմում ներկայացրած 15 անձինք հենց կառավարության կամ նախարարության քվոտայով են նշանակված:
Ի դեպ, հետաքրքիր զուգադիպությամբ 11 հոգին հենց նույն օրը ապրիլի 8-ին են դիմում գրել, այնուհետեւ 3-ը` ապրիլի 9-ին, 1-ը` ապրիլի 12-ին: Ընդ որում, դիմումներում միայն ՀԲԸՄ նախագահ պարոն Յակուբյանն է պատճառաբանություն նշել, մնացածը 1-2 տողանոց դիմումներ են գրել, որ խնդրում ենք դադարեցնել մեր լիազորությունները ԵՊՀ հոգաբարձուների խորհրդում»:
Կառլեն Խաչատրյանի խոսքով, պատճառաբանություն, ըստ էության, չկա եւ ակնհայտ է, որ խորհուրդն այս դիմումների մասին երեք տարբեր նամակների միջոցով իմացել է ԿԳՄՍ նախարարի խորհրդականի միջոցով. «Այդ նամակները ԵՊՀ խորհուրդ հասել են ԿԳՄՍ նախարարի խորհրդականի էլեկտրոնային փոստից, ինչը թերեւս եւս մեկ անգամ ապացուցում է այս պրոցեսի կազմակերպված լինելը: Մենք նաեւ տեղեկություններ ունենք, որ փորձեր են արվել նաեւ մյուս անդամների վրա ճնշում գործադրելու, որովհետեւ համալսարանի կանոնադրությունը հստակ ամրագրում է, որ եթե 16 անդամ, այսինքն՝ 50 տոկոսը հրաժարականի դիմում է ներկայացնում, ապա խորհրդի լիազորություններն ավտոմատ դադարեցվում են: Բայց փաստացի այս պահին բարեբախտաբար կարող ենք նշել, որ իշխանություններն իրենց ուզածին չեն հասել, ուղղակի մի փոքր կազուսային իրավիճակ է ստեղծվել»:
Կառլեն Խաչատրյանը պնդում է, որ անգամ այս կազմում ԵՊՀ հոգաբարձուների խորհուրդն իրավազոր է:
Կարդացեք նաև
Մանրամասն՝ տեսանյութում
Գոհար ՀԱԿՈԲՅԱՆ
