Պետական վերահսկողական ծառայությունը Մեղրիի համայնքապետարանում ավարտել է ստուգումները։ Այս մասին Aravot.am-ի հետ զրույցում ասում է Մեղրիի համայնքի ղեկավար Մխիթար Զաքարյանը։
Հիշեցնենք, որ մարտի 24-ից ՊՎԾ–ն միանգամից ստուգումներ էր սկսել Գորիսի, Սիսիանի, Մեղրիի, Քաջարանի, Կապանի համայնքապետարաններում։ Սյունիքի մարզի քաղաքային համայնքների ղեկավարները (բացի Կապանի քաղաքապետ Գեւորգ Փարսյանից–Ա․ Դ․) դարձել էին Սյունիքի նախկին մարզպետ Վահե Հակոբյանի գլխավորած «Վերածնվող Հայաստան» կուսակցության անդամ, ինչն էլ, ըստ շրջանառվող լուրերի՝ ստուգումների պատճառ էր դարձել։
Մեղրիի համայնքի ղեկավար Մխիթար Զաքարյանը զարմացած է։ «Նորմալ, օրինական ստուգում էր։ Օբյեկտիվությունից բացի՝ ոչինչ չեմ տեսել։ Ստուգումները վերջացրել են, ուղարկեցին իրենց արձանագրած թերությունները, առարկություններով ու պարզաբանումներով հետ ուղարկեցինք»,–ասում է մեր զրուցակիցը։
Ինչ վերաբերում է այն խոսակցություններին, որ իբր ընդդիմադիր հայացքների համար են ստուգումներ իրականացվել՝ Մխիթար Զաքարյանը նշում է, որ առաջին անգամ էր ՊՎԾ–ն ստուգումներ կատարում Մեղրիում։ «Իրենց գործն է, պիտի ստուգեն, հաշվի առնելով նաեւ այն հանգամանքը, որ Մեղրին խոշորացված համայնք»,–ասում է Մեղրիի համայնքի ղեկավարը։
Կարդացեք նաև
Իսկ երբ պատրաստ լինեն ՊՎԾ–ի ստուգման վերջնական արդյունքներն ու եզրակացությունը, Մխիթար Զաքարյանը անպայման կներկայացնի հանրությանը։
Արմեն ԴԱՎԹՅԱՆ
