«Դուք պաշտոններ եք զբաղեցրել ՀԷՑ-ում եւ հիմա ցանկանում եք ՀԾԿՀ անդամ դառնալ։ Այդ պաշտոնները հակադիր են, որովհետեւ դուք փաստարկելու եք այն, որ ՀԷՑ-ը սակագնի բարձրացման առաջարկի դեպքում հանրային շահ չի սպասարկելու։ Այսինքն, հանրային շահի սպասարկման տեսանկյունից դուք պետք է դիմադրեք ՀԷՑ-ի կողմից սակագնի բարձրացմանը»,-ԱԺ լիագումար նիստում այսօր «Իմ քայլը» խմբակցության կողմից ՀՀ հանրային ծառայությունները կարգավորող հանձնաժողովի անդամի պաշտոնում առաջադրված թեկնածու Լեւոն Բունիաթյանին ասաց անկախ պատգամավոր Սերգեյ Բագրատյանը։
«Եղե՞լ է մի դեպք, որ դուք դիրքորոշում արտահայտեք սակագների բարձրացման հայտեր ներկայացրած ՀԷՑ-ի հանդեպ, «Վեոլիա ջրի» կամ բջջային օպերատորների հանդեպ։ Ձեր պաշտոնի ձգտումը համահո՞ւնչ է ձեր անցած ճանապարհին։ Դուք պատրա՞ստ եք հանձնաժողովում սպասարկել հանրային շահը, թե պետք է շարունակեք պաշտպանել բնական մենաշնորհներ ունեցող ընկերությունների շահերը»,-հարցադրումները շարունակեց Սերգեյ Բագրատյանը։
Ի պատասխան Լեւոն Բունիաթյանը նախ հայտնեց, որ 2016թ․-ից այլեւս չի հանդիսանում ՀԷՑ-ի աշխատակից․ «Չեմ տեսնում որեւէ հակադրություն։ Այո, պատրաստ եմ սակագնի բարձրացման բոլոր դիմումները խորն ուսումնասիրել եւ մասնագիտական եզրակացություն տալ՝ ընդդիմանալ, որպեսզի սակագնի բարձրացում չլինի։ Ավելին՝ ՀԷՑ-ում ես աշխատել եմ տեխնիկական բլոկում եւ իրականացրել օպտիմալացում։ Իմ գործունեությունը չի առաջացրել իրավիճակ, որից ելնելով՝ ՀԷՑ-ը մտադիր կլիներ ծախսերը ներառել սակագնի բարձրացման մեջ։ Կողմ եմ, որ էներգակիրների գնի բարձրացում չլինի, որովհետեւ դա ազդում է տնտեսության վրա»։
Բագրատյանը Բունիաթյանից հետաքրքրվեց՝ կարո՞ղ է ապացուցել, որ ՀԷՑ-ում ավելորդ ծախսեր չկան․ «Կասկած կա, որ ծախսագրումների հատվածը մեծացնում են՝ սակագնի բարձրացումը հիմնավորելու համար»։ Բունիաթյանն արձագանքեց, որ հարցին կպատասխանի, եթե ՀԾԿՀ-ում աշխատանքի անցնի․ «Ներկայացված ծախսերը հիմա հնարավոր չէ մեկնաբանել, չեմ տիրապետում տվյալներին»։
Կարդացեք նաև
Անկախ պատգամավոր Տիգրան Ուրիխանյանն էլ որպես օրինակ շեշտեց, որ քաղաքացիներն ամեն Ամանորին ընդառաջ խնդիրների առաջ են կանգնում՝ հայտնաբերելով էլեկտրաէներգիայի հաշվիչների ոչ տրամաբանական թվերը․ «Պատրա՞ստ եք աշխատել ինձ հետ»։ Բունիաթյանը պատրաստակամություն հայտնեց ընտրվելու դեպքում խնդիրն ուսումնասիրել։
Լուիզա ՍՈՒՔԻԱՍՅԱՆ
