Ադրբեջանից հայ գերիների անհապաղ ազատ արձակման և վերադարձի հարցերով Եվրոպական խորհրդարանի հատուկ քննարկման ընթացքում ՀՀ Մարդու իրավունքների պաշտպան Արման Թաթոյանը կարևորեց Ադրբեջանի նկատմամբ միջազգային ճնշումը, որը հնարավորություն կտա խուսափել հետագա բռնություններից:
Քննարկումը կազմակերպվել է Եվրախորհրդարանում ԵՄ-Հայաստան բարեկամության խմբի ղեկավար Լուկաս Ֆուրլասի ջանքերով:
Հարցին՝ Ադրբեջանում գտնվող հայ գերիները մոտ քանի՞սն են, Արման Թաթոյանը պատասխանեց՝ նրանց թիվը հասնում է 300-ի: Նա նաև հայտնեց՝ նրանք մի քանի խմբի են բաժանվում. անձինք, որոնց՝ Ադրբեջանում գտնվելու մասին Ադրբեջանը խոստացել է և անձինք, որոնց մասին Ադրբեջանը հրաժարվում է որևէ տեղեկություն տալ:
Խոսելով հայ գերիների նկատմամբ Ադրբեջանի բռնությունների, վատ վերաբերմունքի մասին՝ ՀՀ ՄԻՊ-ն ասաց. «Այն, ինչ հիմա տեղի է ունենում, առանձին-առանձին բռնության դեպքեր չեն կամ սահմանափակումներ: Դրանք միջազգային չափանիշների կոպիտ խախտումներ են: Եվ միայն համակարգված մոտեցումը կարող է հետագա բռնությունները կանխել: Միջազգային ճնշում պետք է լինի, որպեսզի կանխվեն հետագա բռնությունները»:
Կարդացեք նաև
Ըստ Արման Թաթոյանի՝ միջազգային հանրությունից եկող ոչ միայն քաղաքական բնույթի ուղերձները, այլև մարդու իրավունքներին առնչվողներն իրենց ներդրումը կունենան հայ գերիների անհապաղ ազատ արձակման հարցում:
Տաթև ՀԱՐՈՒԹՅՈՒՆՅԱՆ
