Ադրբեջանից հայ գերիների անհապաղ ազատ արձակման և վերադարձի հարցերով Եվրոպական խորհրդարանի հատուկ քննարկման ընթացքում ԱԺ Եվրոպական ինտեգրման հարցերի մշտական հանձնաժողովի նախագահ Արման Եղոյանն անդրադարձավ այն փաստին, որ Բաքվում բացվել է Արցախյան պատերազմի ժամանակ հայերից խլած ռազմավարի պուրակ: Պուրակի բացման հանդիսավոր արարողությանը մասնակցել է Ադրբեջանի նախագահ Իլհամ Ալիևը:
Նա հայտարարեց. «Ես ուզում եմ ձեր ուշադրությունը հրավիրել այս թանգարանի համատեքստին: Ցուցադրությունը պարունակում է ոչ միայն ռազմավարը, այլև հայ զինվորների մանեկեններ, որոնք շղթայված են, խոշտանգված, դեմքի զարհուրելի արտահայտությամբ: Սա արվում է ամենաբարձր՝ երկրի նախագահի մակարդակով»:
Անդրադառնալով Հայաստան-Ադրբեջան հավանական երկխոսության, այսպես ասած՝ ուղիղ կապերի մասին հարցին՝ Արման Եղոյանն ասաց. «Ես իրականում չեմ պատկերացնում, թե ինչպես այսպիսի վերաբերմունքի պարագայում մենք կարող ենք որևէ բանի մասին խոսել: Ես չեմ տեսնում, թե ինչպես կարելի է մտնել ցանկացած տիպի երկխոսության մեջ այս մակարդակի հայատյացության պարագայում, որը կատարվում է ամենաբարձր պետական մակարդակով, որը քաջալերվում է: Հաշվի առնելով Ադրբեջանի կառավարման համակարգը՝ երկրի ղեկավարի ցանկացած խոսք, ուղերձ ուղիղ տարածվում է հասարակության բոլոր շերտերի վրա: Այս դեպքում իրավիճակն ավելի վտանգավոր է դառնում, քան դա կարող էր դիտվել, օրինակ, ժողովրդավարական հասարակություններում, որտեղ բազմակարծություն է»:
Արման Եղոյանը նաև կարևորեց Ադրբեջանի նկատմամբ ճնշումը մեծացնելը . «Պետք է մտածել տարբերակներ, թե ինչպես կարող են ճնշումն ավելացնել Ադրբեջանի կառավարության նկատմամբ, հակառակ դեպքում ես անկեղծորեն չեմ տեսնում, թե ինչպես կարող է այս հարցը լուծվել առանց միջազգային ճնշման: Ադրբեջանը մի երկիր է, որը միայն ճնշումների լեզուն է հասկանում: Առանց որևէ միջազգային իրավունքի նորմերը հարգելու»:
Կարդացեք նաև
Նա առաջարկեց մի հարթակ ստեղծել Եվրախորհրդարանում, որտեղ անուն առ անուն կարող են բարձրացնել յուրաքանչյուր գերեվարված անձի խնդիրը:
Տաթև ՀԱՐՈՒԹՅՈՒՆՅԱՆ
