Վերջին 1-2 շաբաթում հանրապետությունում կորոնավիրուսային իրավիճակը կայուն լարված է, պահպանվում են վարակման նոր դեպքերի բարձր թվեր, նվազում չկա։ Այս մասին այսօր լրագրողների հետ հանդիպմանն ասաց առողջապահության նախարար Անահիտ Ավանեսյանը։ Նա ասաց, որ դրական թեստերի արդյունքների մեջ հոսպիտալացման կարիք ունեցող հիվանդների համամասնությունը բավական մեծ է, ինչը նշանակում է, տվյալ անձինք ավելի ծանր են տանում հիվանդությունը՝ պայմանավորված մի շարք հանգամանքներով․ «Այս պահին ունենք ծավալված 2600 մահճակալ, որոնք անընդհատ ավելացվում են, սակայն ռեսուրսներն անսահման չեն, դեռեւս ունենք մի փոքր հնարավորություն ավելացնելու մահճակալային ֆոնդը»։
Նախարարի խոսքով՝ հիվանդությունն ունի բավական անկանխատեսելի ընթացք եւ որքան էլ բժշկական օգնություն տրամադրվի, որքան էլ առողջապահական համակարգը իր բոլոր ռեսուսրների գերլարումով սպասարկի, այնուամենայնիվ, ծայրահեղ ծանր ընթացքով հիվանդների բավական մեծ համամասնություն կա․«Զգոնությունը, հիվանդության նկատմամբ վերաբերմունքը պետք է լինի լուրջ։ Որքան էլ մեր երիտասարդները, անձինք հույս ունեն, որ վարակվելու պարագայում թեթեւ են անցկացնելու հիվանդությունը, միեւնույն է, պետք է հասկանալ՝ այն բավական լուրջ հիվանդություն է եւ առողջանալուց հետո թողնում է դեռ չուսումնասիրված հետեւանքներ։ Պատվաստումները կարեւոր միջոցառումն է, որը որը կօգնի կանխարգելել եւ կօգնի համաճարակի էջը փակված համարել որոշ ժամանակը հետո»։
Նելլի ԲԱԲԱՅԱՆ
