«Ես գիտեի 20-22 ռազմագերու վերադարձի տեղեկությունների մասին։ Գուցե ավելի, բայց ինձ թույլ չտվեցի իմ տեղեկությունը տարածել, PR անել, ինչպես արեցին, այդ թվում իշխանական պատգամավորներից, օրինակ՝ կանանցից մեկը, որը որեւէ առնչություն չունի ռազմագերիների հարցի հետ, բայց անընդհատ անպոչ գդալի նման մեջ է ընկնում։ Երեկվա կատարվածն անարգանք էր պետության եւ ծնողների հանդեպ»,-խորհրդարանում լրագրողների հետ ճեպազրույցում այսօր ասաց «Բարգավաճ Հայաստան» խմբակցության պատգամավոր Նաիրա Զոհրաբյանը՝ անդրադառնալով այն փաստին, որ երեկ պաշտոնապես հաստատվեց Բաքվից հայ ռազմագերիների վերադարձի տեղեկատվությունը, սակայն Երեւանում վայրէջք կատարած ինքնաթիռը դատարկ էր։
«Զարհուրելի է, որ ծնողներին ասել էին այսինչ ժամի լինել օդանավակայանում։ Ես գիտեմ, որ ծնողները տներում սեղաններ էին գցել, հագուստով եւ խուրմայով եկել օդանավակայան։ Մի քանիսը չգիտեին իրենց որդին հաստատ գալու է, թե չէ, բայց եկել էին, եւ ինքնաթիռը դատարկ էր։ Դեռ երկար պետք է վերլուծել, թե ինչու այդպես եղավ»,-նշեց Նաիրա Զոհրաբյանը։
Նա հարցադրում արեց՝ Ալիեւն էլ ինչպե՞ս պետք է մեր երկիրը նվաստացնի, որպեսզի ժողովուրդը հասկանա իրավիճակը, իսկ Նիկոլ Փաշինյանը գիտակցի, որ ինքը պարտված ղեկավար է, որ իր հետ որեւէ մեկը հաշվի չի նստում եւ չի կարող բանակցել։
Կարդացեք նաև
Լուիզա ՍՈՒՔԻԱՍՅԱՆ
