«Գուցե Ադրբեջանը սպասում է, որ Թուրքիայի իշխանությունն էլ մասնակցի գերիների խնդրի լուծմանը, չեք տեսնո՞ւմ»,-խորհրդարանում լրագրողների հետ ճեպազրույցում այսօր ասաց ՀՀ ԱԺ պաշտպանության եւ անվտանգության հարցերի հանձնաժողովի նախագահ, «Իմ քայլի» պատգամավոր Անդրանիկ Քոչարյանը՝ անդրադառնալով հայ ռազմագերիների վերադարձի խնդրին։
Հարցին, թե ինչպես, Քոչարյանը պատասխանեց․ «Բարի կամքով․․․գուցե ցանկություն կա, որ պարոն Պուտինն ու Էրդողանն իրար հետ մի հատ էլ խոսեն, չեք տեսնո՞ւմ դա»։
Ինչ վերաբերում է Ադրբեջանի ԱԳ նախարարի երեկվա հայտարարությանը, թե ռազմագերիների հարցը փակված է, իսկ եղած անձինք ոչ թե ռազմագերի են, այլ ահաբեկիչ, Անդրանիկ Քոչարյանը շեշտեց․ «Ինչ-որ պայմանավորվածություն երբ չի կատարվում, նա ստիպված ասում է, որ նրանք ռազմագերի չեն։ Փաստ է, որ Ռուստամ Մուրադովը երեկ Բաքու էր գնացել գերիներին բերելու համար: Եթե պայմանավորվածություն չլիներ, ինքնաթիռն ինչո՞ւ պետք է գնար»։
Լուիզա ՍՈՒՔԻԱՍՅԱՆ
