Կառավարության հեղինակած՝ վարչական դատավարության օրենսգրքում փոփոխությունների նախագծի համաձայն՝ որոշ վարչական իրավախախտումների բողոքարկման գործերը դատարանում կքննվեն գրավոր ընթացակարգով։ Այս մասին այսօր ԱԺ պետաիրավական հարցերի հանձնաժողովի նիստում ասաց արդարադատության նորանշանակ փոխնախարար Սուրեն Գրիգորյանը՝ մատնանշելով, որ վարչական դատարանը եւ մյուս դատարանները բավականին ծանրաբեռնված են աշխատում, եւ դրա պատճառներից մեկը վարչական իրավախախտումների մասին օրենսգրքով սահմանված իրավախախտումների բողոքարկումների քննության ընթացակարգն է։
Սուրեն Գրիգորյանի խոսքով՝ հաճախ բողոքարկման պայմաններում կողմերը չեն ներկայանում նիստերին, եւ դատավորները ստիպված են լինում բանավոր՝ հրապարակային կարգով քննություն իրականացնել, իսկ իրենց առաջարկով՝ որոշ իրավախախտումներով բողոքարկումները վարչական դատարանում կքննվեն գրավոր ընթացակարգով։ «Մի շարք հոդվածների (առանց ամրակապվելու տրանսպորտային միջոցով երթեւեկելը, տրանսպորտային միջոցի հաշվառման համարանիշի օգտագործման կանոնների խախտումը, հիմնական ավտոճանապարհներով կվադրոցիկլ վարելը, լուսացույցի կանոնների խախտումներով երթեւեկելը, ավտոկայանատեղիների կանոնները խախտելը) դեպքում առկա բողոքարկումների դատաքննությունը կիրականացվի գրավոր ընթացակարգով, իսկ կողմերը չեն զրկվի միջնորդություններ ներկայացնելու հնարավորությունից։ Բացառություն կլինեն այն դեպքերը, երբ դատավորը կորոշի գործը քննել ոչ գրավոր ընթացակարգով»,-նշեց Սուրեն Գրիգորյանը։
Լուիզա ՍՈՒՔԻԱՍՅԱՆ
