Հրապարակումներ եղան, որ «AstraZeneca» ընկերության պատվաստանյութով պատվաստվելու դեպքում խնդիրներ են առաջանում: Այսօր այս առնչությամբ լրագրողների հետ զրույցում ԱԺ առողջապահության եւ սոցիալական հարցերի հանձնաժողովի նախագահ Նարեկ Զեյնալյանն ասաց, որ հրապարակումներում կապը անմիջական մահերի եւ պատվաստանյութի հետ ապացուցված չէ: Որոշ երկրներ մինչեւ 50 տարեկաններին հրաժարվեցին ներարկել, օրինակ, Կանադան, Գերմանիան սկզբից հրաժարվել է, հիմա նորից ընդունել է ու շարունակում է պատվաստումները. «ՌԴ-ի հետ գնում են բանակցություններ՝ պատվաստանյութի որոշ չափաքանակ բերելու համար: 2000 չափաբաժին նվիրատվության ձեւով տրամադրվել է, այն տրամադրվում է ռիսկային խմբերին, ինֆեկցիոնիստներին: Հիմա միաժամանակ միասնական հարթակի հետ կա պայմանագիր, փոխանցվել է գումար, որ այնտեղից եւս տրամադրվեն պատվաստանյութեր»:
Զեյնալյանն ասաց, որ այս պահին բավականին մեծ քանակ կա հերթագրումների, ովքեր ուզում են պատվաստվել «AstraZeneca»-ով. «Մեծ թվով պահանջարկ կա եւ հերթագրումներ կան՝ պատվաստվելու համար: Պարտադիր սկզբունքով որեւէ պատվաստում ՀՀ-ում չի եղել, միայն կամավորության սկզբունքով»: Ամեն դեպքում նա ասաց, որ քաղաքացիներին պետք է ճիշտ իրազեկել, ներկայացնել բոլոր խնդիրները, բացատրել, որ դա է հիվանդության դեմ պայքարի տարբերակը:
Հարցին՝ լուրեր կան, որ առողջապահության նախարարի մայրը, բարձրաստիճան պաշտոնյաներ «Սպուտնիկ Վ»-ով են պատվաստվել, ունի՞ նման տեղեկություններ՝ Զեյնալյանը պատասխանեց, որ չունի, ինքն էլ չի պատվաստվել. «Ամեն ինչ պետք է արվի, որ պատվաստումները լինեն անվճար, առայժմ վճարումներով պատվաստումների հարց չկա: Պատվաստումները առայժմ տրամադրվում են պետությանը եւ պետությունն անվճար է դա անում, մասնավոր ընկերություններին չի տրամադրվում»:
Կարդացեք նաև
Ճեպազրույցի վերջում լրագրողները նկատեցին, որ Զեյնալյանն առանց դիմակի էր: Նա բացատրեց, որ նոր է հանել դիմակը, մինչ այդ կրում էր. «Դիմակ բոլորը պետք է կրեն»:
Հռիփսիմե ՋԵԲԵՋՅԱՆ
