«ՍԴ երեք նոր անդամները գործել են նույն սցենարի շրջանակում, որում կգործեին նախորդները։ Նրանց ընտրությունն ԱԺ-ում բովանդակային, արժեքային փոփոխության չբերեց ՍԴ-ի համար»,-խորհրդարանում լրագրողների հետ ճեպազրույցում այսօր ասաց անկախ պատգամավոր Արման Բաբաջանյանը՝ անդրադառնալով այն փաստին, որ վերջերս ՍԴ-ն հակասահմանադրական ճանաչեց 300.1 հոդվածը, իսկ այդ հոդվածով քրեական հետապնդումը երկրորդ նախագահ Ռոբերտ Քոչարյանի եւ մյուս նախկին պաշտոնյաների հանդեպ դադարեցվեց։
«Այդ որոշմամբ ՍԴ-ն կանգնել է սահմանադրական կարգը տապալողի կողքին եւ ինքը տապալել սահմանադրական կարգը։ Ամենամեծ սպառնալիքն այսօր երկրի ներքին անվտանգությանը՝ ՍԴ-ն է»,-համոզմունք հայտնեց Արման Բաբաջանյանը։
Նա կարծում է, որ ՍԴ-ի որոշումը ԲԴԽ նախագահ Ռուբեն Վարդազարյանի՝ 2020թ․-ի հայտնի հայտարարության շրջանակում է․ «Դատավորները շարունակում են որոշումներ կայացնել դրա շրջանակում»։
Կարդացեք նաև
Արման Բաբաջանյանի համոզմամբ՝ եթե ՍԴ-ն չի պաշտպանում սահմանադրական արդարադատությունը եւ անհեթեթ որոշմամբ ինքն էլ դառնում է սահմանադրական կարգի տապալող, ապա այդ դատարանը համարժեք չէ ներքին, ժողովրդավարական սպասումներին․ «Առաջիկայում ընտրություններ են, եւ չի բացառվում, որ դրանց արդյունքները վիճարկվեն ՍԴ-ում»։
Լուիզա ՍՈՒՔԻԱՍՅԱՆ
