«Հույս ունեի, որ իշխանությունն առնվազն գործող մի քանի պաշտոնյաների գլուխները պետք է «թռցրած» լիներ։ Մի քանի պաշտոնյաներ արդեն պետք է պաշտոնանկ արված լինեին։ Արդարադատության նախարարն արդեն չպետք է լիներ իր պաշտոնին, որովհետեւ ուղղակի պատասխանատու է եղել դատական համակարգն առողջացնող բարեփոխումների համար»,-խորհրդարանում լրագրողների հետ ճեպազրույցում այսօր անդրադառնալով սահմանադրական կարգի տապալման գործով տեղի ունեցած զարգացումներին՝ ասաց անկախ պատգամավոր Արման Բաբաջանյանը։
Հիշեցնենք, որ 300.1 հոդվածով (սահմանադրական կարգը տապալելը) քրեական հետապնդումը երկրորդ նախագահ Ռոբերտ Քոչարյանի եւ մյուս նախկին պաշտոնյաների հանդեպ դադարեցվեց։
«Սա խոսում է երկչոտ, անկարող իշխանության մասին։ Դատական համակարգը դիրքավորվել է այս միջավայրին համապատասխան։ ՍԴ-ն եւ դատական համակարգն առհասարակ ուղղակի ցույց են տալիս, թե հանցավոր գործակցությամբ ինչպես են ընդունակ մարտի մեկի գործը տապալել։ Կա հանցանք, էլ չկա հոդված։ Բայց կա 85 հատորանոց քրեական գործ, որում ահռելի վկայություններ կան արդեն անմեղ ճանաչված Ռոբերտ Քոչարյանի հանցակցության մասին»,-համոզմունք հայտնեց Արման Բաբաջանյանը։
Կարդացեք նաև
Նրա բնորոշմամբ՝ դատական իշխանությունն ընտրություններին ընդառաջ համակրանք է ցույց տալիս որոշակի քաղաքական ուժերի հանդեպ եւ գործում է պետության դեմ։
Լուիզա ՍՈՒՔԻԱՍՅԱՆ
