«Թող այդպես մտածեն: Իրենք կարող է չսպասեն էլ ՍԴ որոշմանը, հիմա նորից սկսեն 300.1 հոդվածով քրեական հետապնդում»,- Ռոբերտ Քոչարյանի և մյուսների գործով դատական նիստի ավարտից հետո լրագրողների հետ զրույցում պատասխանելով հարցին՝ քանի որ ՀՀ գլխավոր դատախազ Արթուր Դավթյանը դիմել է ՍԴ, հնարավո՞ր է քրեական գործը վերաբացվի, հայտարարեց ՀՀ երկրորդ նախագահ Ռոբերտ Քոչարյանի պաշտպանական թիմի անդամ Արամ Օրբելյանը:
Նա նշեց՝ իրենք երկուսուկես-երեք տարի արձանագրում են, որ ՔՕ 300.1 հոդվածի կիրառության, որոշակիության, հետադարձության խնդիր կա:
Նա վստահեցրեց՝ բոլորին էլ պարզ էր՝ ի սկզբանե գործընթացն ապօրինի էր: Նա դիմելով լրագրողներին հորդորեց լրագրողական հետաքննություն իրականացնել, թե ինչքան գումար է պետությունը ծախսել, ինչքան գումար է հասարակությունը ծախսել քրեական գործընթաց իրականացնելու համար, որն ի սկզբանե ապօրինի էր:
Խոսելով գործի վերաբացման թեմայով՝ Արամ Օրբելյանը հավաստիացրեց. «Վերաորակավորման որևէ կառուցակարգ չկա, նոր մեղադրանք առաջադրելու որևէ հիմք չկա: Ամեն գնով անձին դատապարտելու մոլուցքը, հակաիրավական, հակամարդկային, հակասահմանադրական է: Մարդու անմեղության կանխավարկածը՝ որպես մարդու կարևորագույն իրավունքներից մեկը պետք է վերջապես ընկալենք»:
Կարդացեք նաև
Լրագրողները հետաքրքրվեցին՝ իսկ տասը զոհերի հարցը ինչպե՞ս պիտի լուծվի, նա պատասխանեց. «Ձեր հենց այդ հարցը նրա մասին է, ինչ ասում եմ: Դուք արդեն որոշեցիք, որ եղել է սպանություն, որ եղել են հրամաններ սպանություններ իրականացնելու, որ երկրի քաղաքական ղեկավարն այդ գործընթացում ունի անմիջական մասնակցություն: Մինչդեռ պետք է պարզել՝ սպանությո՞ւն է եղել, թե անզգուշությամբ մահ են պատճառել: Բազմաթիվ քրեադատավարական հոդվածներ կան, որոնք մարդու մահվան դեպքում կարող են գործել:
Արամ Օրբելյանի կարծիքով՝ տուժողների իրավահաջորդները ոչ թե պետք է շահագրգռված լինեն, որ կոնկրետ մեկ մարդ դատապարտվի, այլ հանգամանքները պարզաբանվեն:
Տաթև ՀԱՐՈՒԹՅՈՒՆՅԱՆ
