Այսօր Սեւանում հանրահավաք էին կազմակերպել «Հայրենիքի փրկության շարժման» անդամները: ՀՅԴ ԳՄ ներկայացուցիչ Իշխան Սաղաթելյանն իր ելույթում ասաց. «ՔՊ-ական այն պատգամավորները, ովքեր այս տարածքից իբրեւ ուսապարկեր եկան, ձեզանից 15-20 հազար ձայն հավաքեցին, հայտնվեցին այդ խորհրդարանում, մաս կազմեցին այս դավաճանական գործընթացին, մինչեւ հիմա ձեզանից ներողություն չեն խնդրել: Խոստանում եմ՝ իրենք ձեզանից ներողություն խնդրելու են, որովհետեւ հերթական անգամ խաբել են ձեզ»:
Իշխան Սաղաթելյանը հիշեցրեց, թե ինչ խոստումներ էին տվել իշխանությունները՝ անվտանգություն, բարեկեցիկ կյանք, արժանապատիվ ապագա, բարձր աշխատավարձ, խոստացել էին լավ կրթություն, մինչդեռ 3 տարի անց ունենք կորսված հայրենիք, 5000-ից ավելի զոհեր, փլուզված տնտեսություն ու հայ մարդը այլեւս հույս չի կապում հայրենիքի հետ. «Այսօր արտագաղթում են մարդիկ անգամ, ովքեր ունեն ապրելու հնարավորություն»:
Նա հորդորեց մարդկանց միանալ իրենց՝ վստահեցնելով որ այս իշխանությունները չեն կարող քաղաքացիների շահը ներկայացնել. «3 տարի առաջ իշխանության ներկայացուցիչները եկան ձեր մարզ, խոստացան ներդրումներ, ճոպանուղի, ճեմուղի…Ի՞նչ են արել, հարց եմ տալիս: Ո՞ւր են այդ ներդրումները: Չկան, հերթական անգամ խաբել են, ստել են»:
Կարդացեք նաև
Հռիփսիմե ՋԵԲԵՋՅԱՆ
