«Հիմնական խնդիրները որոշ դեպքերում եղել են սարքերի բացակայությունը, դրանց որակի բացակայությունը, ինտերնետ կապը, բայց, բարեբախտաբար, հանրակրթական համակարգը կարճ ժամանակում ստանդարտ վիճակից անցավ արտակարգ իրավիճակում աշխատելուն»,-ԱԺ մարդու իրավունքների պաշտպանության եւ հանրային հարցերի մշտական հանձնաժողովի կազմակերպած՝ «Հեռավար կրթության հոգեբանական ազդեցությունը կրտսեր դպրոցականների, նրանց ծնողների եւ ուսուցիչների վրա» թեմայով քննարկման ժամանակ այսօր հայտարարեց ՀՀ կրթության տեսչական մարմնի ղեկավար Ալեքսանդր Շագաֆյանը։
«Արդյունքում արձանագրվել է ավելի քան 80% ներգրավվածություն։ Իհարկե հասկացանք, որ մեթոդաբանության խնդիր ունենք, որ մեր մասնագետները հեռավար կրթությունը սկզբում պատկերացրել են որպես 45 րոպեանոց ռեժիմ, բայց էլի հասկանում ենք, որ իրավիճակն էր այդպիսին։ Տեսչական մարմինը փորձում է հասկանալ, թե հանրակրթական ուսումնական հաստատությունները որքանով են դիմակայում աղետներին եւ դրա հետեւանքներին»,-նշեց Ալեքսանդր Շագաֆյանը։
Նրա խոսքով․ «Այս տարվա ավարտից հետո պատկերացում կունենանք, թե այն դպրոցները, որոնք դիտարկելու ենք, որեւէ պլան ունե՞ն, թե կովիդի կամ այլ իրավիճակում ինչ են անելու՝ օր առաջ կրթական գործընթացը վերականգնելու համար»։
Լուիզա ՍՈՒՔԻԱՍՅԱՆ
