«Սեպտեմբերից ամենայն հավանականությամբ հեռավար ուսուցումը չի լինի կենտրոնացված, անցնելու ենք ապակենտրոնացման։ Հիմա հայտարարել ենք մրցույթ եւ ընտրելու ենք քսան դպրոցներ, որոնք հնարավորություն կունենան կարողությունների զարգացման ծառայություններ ստանալ մեզանից, մենթորների միջոցով սովորել, թե ինչպես պետք է դասավանդեն առցանց միջավայրում»,-ԱԺ մարդու իրավունքների պաշտպանության եւ հանրային հարցերի մշտական հանձնաժողովի կազմակերպած՝ «Հեռավար կրթության հոգեբանական ազդեցությունը կրտսեր դպրոցականների, նրանց ծնողների եւ ուսուցիչների վրա» թեմայով քննարկման ժամանակ այսօր հայտարարեց ՀՀ ԿԳՄՍՆ ներկայացուցիչ, «Կրթական տեխնոլոգիաների ազգային կենտրոնի» հեռավար ուսուցման կազմակերպման բաժնի ղեկավար Հայկ Դավեյանը։
Նրա փոխանցմամբ՝ սեպտեմբերից երեսուն մենթորները ծառայություններ կմատուցեն սահմանամերձ այն դպրոցների աշակերտներին, որոնցում ուսուցիչներ չկան․ «Այս պահին թիրախավորել ենք 101 դպրոցներ, որոնցում 695 ուսուցչի խնդիր կա։ Սեպտեմբերի սկզբին կունենանք էլեկտրոնային դասավանդման դպրոցներ, որոնք ծառայություններ կմատուցեն 101 այլ դպրոցների։ Իրենց հետ առաջնահերթ մեթոդաբանական աշխատանք ենք անելու, որովհետեւ նախեւառաջ դրանից են կաղում։ Քսան դպրոցի հետ մեկական մենթոր կաշխատի»։
Լուիզա ՍՈՒՔԻԱՍՅԱՆ
