Ռուսաստանի նախագահ Վլադիմիր Պուտինն ապրիլի 7-ին Հայաստանի վարչապետ Նիկոլ Փաշինյանի հետ կքննարկի Լեռնային Ղարաբաղի հիմնահարցի լուծմանն ուղղված քայլեր, ինչպես նաև ինտեգրացիոն գործընթացներ: Այս մասին ասվում է Կրեմլի տարածած հաղորդագրության մեջ:
«Ապրիլի 7-ին Մոսկվայում տեղի կունենան ՌԴ նախագահ Վլադիմիր Պուտինի բանակցությունները ՀՀ վարչապետ Նիկոլ Փաշինյանի հետ, որը Ռուսաստանում կգտնվի աշխատանքային այցով: Նախատեսվում է քննարկել Լեռնային Ղարաբաղի շուրջ Ռուսաստանի, Հայաստանի և Ադրբեջանի առաջնորդների՝ 2020թ. նոյեմբերի 9-ի և 2021թ. հունվարի 11-ի հայտարարությունների իրականացման ընթացքը, ինչպես նաև տարածաշրջանում առկա խնդիրների հետագա լուծմանն ուղղված քայլեր՝ մասնավորապես Հարավային Կովկասում տնտեսական և տրանսպորտային կապերի վերականգնման համատեքստում»,- ասվում է հաղորդագրության մեջ:
Բացի այդ, նախատեսվում է քննարկել հայ-ռուսական միութենական գործընկերության զարգացմանն ուղղված հարցեր, ինչպես նաև եվրասիական տարածությունում ինտեգրացիոն միավորումներում գործակցության հեռանկարները:
Պատրաստեց՝ Վիկտորյա ԱՆԴՐԵԱՍՅԱՆԸ
