Այս տարի օտարերկրյա քաղաքացիներն ավելի շատ վաճառել են մեր երկրում իրենց պատկանող անշարժ գույքը, քան գնել: Այս մասին տեղեկանում ենք ՀՀ վիճակագրական կոմիտեի այսօր հրապարակած տվյալներից: 2021 թվականի հունվար-փետրվարին Ռուսաստանի Դաշնության 173 քաղաքացիներ վաճառել են Հայաստանում ունեցած իրենց անշարժ գույքը, որից 58-ը հողատարածքներ, 38-ը գյուղատնտեսական նշանակության հողեր են:
ԱՄՆ 11 քաղաքացիներ նույնպես վաճառել են Հայաստանում ունեցած իրենց անշարժ գույքը, որից 2-ը հողատարածք, մեկը՝ գյուղնշանակության հող:
Իրանի քաղաքացի հանդիսացող 8 մարդ է այստեղ ունեցած իր անշարժ գույքը վաճառել: Եվրոպական պետություններից 7 քաղաքացիներ են այդ քայլին գնացել: ԱՊՀ պետություններից 10 քաղաքացիներ են անշարժ գույքը վաճառել:
Ընդհանուր առմամբ, այս երկու ամիսների ընթացքում 212 օտարերկրյա քաղաքացիներ վաճառել են Հայաստանում ունեցած իրենց անշարժ գույքը:
Կարդացեք նաև
Անշարժ գույք ձեռք բերած օտարերկրյա քաղաքացիները գրեթե եռակի անգամ պակաս են վաճառողներից: 2021-ի հունվար-փետրվարին ընդամենը 76 օտարերկրացիներ են մեր երկրում անշարժ գույք ձեռք բերել, որից 37-ը ՌԴ քաղաքացիներ, 12-ը՝ ԱՄՆ-ի, 8-ը՝ Իրանի եւ այլն:
Օտարերկրյա քաղաքացիները ամենաշատը Երեւանում են անշարժ գույք ձեռքբերել կամ վաճառել, ապա՝ Արմավիրի ու Կոտայքի մարզերում:
Վիճակագրական կոմիտեն հրապարակել է նաեւ գրավադրման գործարքները՝ թե այս երկու ամիսների ընթացքում որ մարզում որքան անշարժ գույք է գրավ դրվել: Գրավադրված գույքի 55 տոկոսը Երեւանում է գտնվում, 12 տոկոսը՝ Կոտայքում, ապա՝ Արագածոտնում, Շիրակում, Սյունիքում եւ այլ մարզերում:
Կոմիտեի հրապարակած ցանկից տեղեկանում ենք, որ մեր քաղաքացիներն ամենաշատը բնակարանն են գրավ դրել: Գրավի առարկա են հանդիսացել նաեւ հասարակական եւ արտադրական նշանակության շինությունները, հողատարածքները, ավտոտնակները: Նշյալ ժամանակահատվածում մեր երկրում 1133 բնակարան, այդ թվում բնակելի տուն, գրավ է դրված, որից 322-ը՝ մարզերում:
Գրավադրված 110 հողատարածքներից 45-ն էլ գյուղատնտեսական նշանակության են: Գրավի առարկա են հանդիսանում 209 արտադրական եւ հասարակական նշանակության շենք-շինություններ:
Լուսինե ԲՈՒԴԱՂՅԱՆ
Լուսանկարը՝ samujanyan.wordpress.com-ից
