ՀՀ առողջապահության նախարարի հրամանով մարտի 25-ից Վանաձորի բժշկական կենտրոնը կրկին վերապրոֆիլավորվեց: Այս պահին հիվանդանոցի թերապեւտիկ բաժանմունքի մի մասը ծառայում է կորոնավիրուսային հիվանդության բուժման համար:
40 մահճակալ հզորությամբ բաժանմունքն այժմ ծանրաբեռնված է 100 տոկոսով: Մասնագետները հիվանդների վիճակը գնահատում են միջին ծանրությունից մինչեւ ծանր. «Քանի որ մենք բազմապրոֆիլ հիվանդանոց ենք, մեր գործառույթների մեջ մտնում է նաեւ մեկուսարանների ընդունարանի աշխատանքը: Ընդունարանում մենք ունենք ինտենսիվ հսկողության սենյակ, փոքր ռեանիմացիայի նման, այդ սենյակը միշտ զբաղված է: Այդտեղ գրեթե միշտ մոտ 10 հիվանդ սպասում է՝ կա՛մ թեստի պատասխանի, կա՛մ սպասում են, որ մեր բաժանմունքում կամ այլ հիվանդանոցում տեղ ազատվի, որպեսզի իրենց տեղավորենք: Այս փուլում իրենք բուժում ստանում են»,- ասաց Վանաձորի բժշկական կենտրոնի տնօրեն Վահագն Մկրտչյանն ու հավելեց, որ հիվանդանոցում գործում է նաեւ հետկորոնավիրուսային բաժին. «Այստեղ բուժվում են մարդիկ, որոնք բացասական թեստով թոքաբորբ են, բայց թթվածին կախյալ են, կամ այլ հիվանդանոցներից են ուղարկում՝ հետագա հսկողության եւ բուժման: Այստեղ եւս 8-ից 10 հոգի մշտապես բուժվում է»:
Վահագն Մկրտչյան
Մկրտչյանն ասում է, որ հիվանդության նվազման մասին խոսելը դեռ վաղ է: Սա արդեն երրորդ ալիքն է, իսկ հիվանդությունը ծաղկման մեջ է: ԲԿ տնօրենի խոսքով՝ այս պահին հիվանդանոցը մասնագետների կարիք չունի:
Վերապրոֆիլավորումից անմիջապես հետո բաժանմունքը համալրվել է համապատասխան աշխատակիցներով. «Քանի որ սա արդեն երկրորդ անգամն է, որ վերապրոֆիլավորվում ենք, մասնագետներ ունենք: Այն ժամանակ էլ էինք ընդունել հենց Կովիդի հետ աշխատած բժիշկներ՝ բավականին փորձառու եւ երիտասարդ: Մենք անմիջապես 2 օրվա մեջ այդ բոլոր մասնագետներին մոբիլիզացրեցինք եւ ընդունեցինք աշխատանքի: Միայն մեր մասնագետները քիչ են, քանի որ մենք ունենք ընդունարան եւ բաժանմունք՝ շուրջօրյա հերթափոխով»:
Կարդացեք նաև
Վանաձորի բժշկական կենտրոնի տնօրենը զգուշացնում է․ «Կխնդրեմ, որ մեր ժողովուրդը զգոն լինի, հարգեն ու խղճան առողջապահության աշխատակիցներին, հարգեն մեր աշխատանքը: Ի վերջո` ամբողջ ծանրաբեռնվածությունն ընկնում է առողջապահական համակարգի վրա: Բնական է, մեր ռեսուրսներն անծայրածիր չեն, չես կարող անվերջ բաժանմունքներ եւ հիվանդանոցներ բացես: Ժողովուրդն ինքը պետք է գիտակցի, որ կա հիվանդություն, որը բարդ է, իսկ բարդանալուց էլ անդառնալի հետեւանքներ է ունենում… Ամեն օր հազարից ավելի դեպք է գրանցվում: Հիվանդների 80 տոկոսից ավելին էլ թեթեւ է տանում եւ տնային պայմաններում են բուժվում: Իմ կոչը ժողովրդին՝ լինել ավելի զգոն»:
Տաթեւիկ ՂԱԶԱՐՅԱՆ
