Հրապարակվել է Համաշխարհային բանկի Եվրոպա և Կենտրոնական Ասիա տարածաշրջանի տնտեսական զարգացումների գարնանային զեկույցը: Ըստ ՀԲ-ի փորձագետների կանխատեսման՝ Հայաստանում 2020-ին 7,6% տնտեսական անկումից հետո 2021-ին այն կվերականգնվի մինչև 3,4%: «Սակայն աճի այս միտումը փոխկապակցված է երկրում COVID-19 հետագա մեղմացման և հետպատերազմյան իրողությունների հանգուցալուծման հետ»,- ասվում է զեկույցում։ Համաշխարհային բանկը ներկայացրել է նաև 2022-2023 թթ. Հայաստանում տնտեսական աճի կանխատեսումները, համապատասխանաբար՝ 4,3% և 5,3%։
Հայաստանի Կենտրոնական բանկը 2021-ի համար տնտեսական աճի կանխատեսված ցուցանիշը նվազեցրել էր։ Եթե նախկինում ԿԲ-ն այս տարվա համար կանխատեսում էր 2%-ի տնտեսական աճ, ապա մարտի 16-ի դրությամբ այդ թիվը նվազեցվեց 1,4%-ի։
Տնտեսագետ Ատոմ Մարգարյանը Համաշխարհային բանկի այս կանխատեսումը համարում է ոչ իրատեսական։ «Համաշխարհային բանկի փորձագետները անհույս լավատեսությամբ են տառապում»,- «Ժամանակ»-ի հետ զրույցում ասաց Մարգարյանը։
Իրատեսականը, ըստ տնտեսագետի, տնտեսական աճի 1.5-2 տոկոսն է։ Եվ այս իմաստով իրատեսականը թերևս ՀՀ Կենտրոնական բանկի կանխատեսումն է։
Կարդացեք նաև
Ատոմ Մարգարյանը կարևոր է համարում նաև այն, թե ինչպիսին են լինելու առաջիկայում արտաքին միջավայրը և ռազմաքաղաքական իրավիճակը։ Իսկ այն, ինչ տեղի է ունենում նոյեմբերի 9-ի լույս 10-ի գիշերը ստորագրված համաձայնագրի կատարման կոնտեքստում, ուղղակի նման լավատեսական եզրակացություններ ու կանխատեսումներ անելու որևէ հիմք չի տալիս, քանի որ մյուս կողմը զանգվածաբար խախտում է ստանձնած պարտավորությունները:
«Բացի դրանից, լոգիստիկ խնդիրները շարունակում են մնալ, շարունակում են ավելանալ ճնշումները Ռուսաստանի նկատմամբ սանկցիաների տեսքով, և ակնկալել, որ մեր հիմնական գործընկեր երկրի կողմից Հայաստան լուրջ ներդրումներ կգան և նաև մասնավոր դրամական փոխանցումները կավելանան՝ ուղղակի իրատեսական չէ։ Հետևաբար ամբողջությամբ վերցրած Համաշխարհային բանկի կանխատեսումը ռեալ չէ, կրկնակի բարձր թվեր են ֆիքսված, քան կարող է լինել»,- եզրափակեց Մարգարյանը։
Սոնա ՀԱՐՈՒԹՅՈՒՆՅԱՆ
Հոդվածն ամբողջությամբ՝ «Ժամանակ» օրաթերթի այսօրվա համարում:
