Երեւանի կենդանաբանական այգու 5 տարեկան բնակիչն իր աշխուժությամբ բոլորի ուրախությունն է դարձել. դեղնիրան լորի տեսակին պատկանող թութակն այգում միակ խոսող թութակն է, անունը՝ Հայկո:
Հայկոն շատախոս ու քմահաճ է, երբեմն նույնիսկ արտառոց վարքի տեր: Եթե ինչ-որ մեկը իրեն դուր չի գալիս, ապա նրան «էշ» է անվանում: Ի դեպ, դա նրա ամենակիրառելի բառերից է:
Մեր այցի ժամանակ թութակին կենդանաբանականի ձմեռային փակ այգուց նոր էին տեղափոխել դուրս՝ գարնանային այգի, դեռ ադապտացման պրոցեսում էր: Թռչունների բաժնի ավագ խնամող Գարեգին Խլղաթյանի խոսքով՝ դրանով էր պայմանավորված Հայկոյի համեմատաբար քչախոսությունը:
Հայկոն գրեթե նույնությամբ կրկնօրինակում է հեռախոսազանգերի ձայները, հատկապես այն ձայները, որոնք իրեն խնամողների հեռախոսներից է լսել: Մեր այցի ժամանակ էլ, երբ թութակը լսեց հեռախոսազանգի ձայնը մի քանի վայրկյան լրջացած մնաց ու սկսեց «ալո» ասել, ապա քթի տակ ինչ-որ բաներ խոսել, տպավորություն ստեղծելով, թե ինչ-որ մեկի հետ շատ կարեւոր հարց է քննարկում:
Կարճատեւ դադարներ տալով Հայկոն անընդհատ Մարո անունն էր կանչում՝ «եկավ» «ուր ես» «Մարո՜». պարզվեց Մարոն այգու երկար տարիների աշխատակիցներից է եղել, որը խնամել է Հայկոյին: «Մարոն մեծ կին էր, ցավոք սրտի մահացել է, գրեթե մեկ տարի է անցել, բայց Հայկոն հիշում ու անընդհատ կանչում է նրան»,-ասաց Գարեգին Խլղաթյանը:
«Հիմնականում ուրախ ու ակտիվ է, բայց երբեմն ջղայնանում ու վատ բառեր է ասում: Մենք էլ, որ երբեմն կերը ուշացնում ենք, կամ ինչ-որ բան իր սրտով չենք անում մեզ էշ, կամ այլ վատ բառեր է ասում», -ժպիտով պատմեց խնամողն ու այդ պահին ավելը վերցրեց Հայկոյի ճանկերից: Հայկոն, թերևս, խնամողից նման վերաբերմունք չէր սպասում, ջղային տոնայնությամբ սկսեց ձայներ արձակել, խնամողի հետ կռվել, ապա սկսեց վիրավորական արտահայտությունների տարափը:
Աղունիկ ՀՈՎՀԱՆՆԻՍՅԱՆ
Հոդվածն ամբողջությամբ՝ «Հայկական ժամանակ» օրաթերթի այսօրվա համարում:
