Առաջին ընթերցմամբ ընդունված «Ընտրական օրենսգրքի» նախագծում բացի ռեյտինգային ընտրակարգը հանելուց նաեւ փոփոխություններ էին նախատեսված՝ համավարակով պայմանավորված ընտրություններն անցկացնելու համար:
Սակայն նախագահի աշխատակազմից արձագանքել են, որ կորոնավիրուսի կարգավորումների հետ կապված իրենք խնդիրներ են տեսնում, այդ իսկ պատճառով երկրորդ ընթերցման ժամանակ նախագծի համահեղինակ Վահագն Հովակիմյանն ասաց, որ այդ կարգավորումները հանել են: Մնում է պարզ համամասնական ընտրակարգի անցումը եւ որոշ տեխնիկական փոփոխություններ:
Նախագծի համահեղինակ Համազասպ Դանիելյանը «Ընտրական օրենսգրքի» փոփոխությունների էպոպեան ներկայացրեց՝ հիշեցնելով, թե ինչպես նախկին իշխանությունները մեծամասնական ընտրակարգի անցան, նոր խմբագրությամբ Սահմանադրությունում ամրագրեցին, որ պետք է անցում կատարեն համամասնական ընտրակարգի, բայց հետո պարզվեց, որ անցկացրեցին համամասնականի մի այնպիսի տարատեսակ, որտեղ վերարտադրվում էր մեծամասնական ընտրակարգի տրամաբանությունը եւ կրկնապատկում էր այդ օրվա իշխանության վերարտադրվելու հավանականությունը. «Երբ որ խոսում են տարածքներից ընտրված պատգամավորների մասին, մենք ունեցել ենք տարածքներ, որտեղից ընտրվել են պատգամավորներ, իսկ հետո 4-5 տարին մեկ անգամ գնացել են այնտեղ, մի հատ ասֆալտ են փռել, մի հատ կտուր են սարքել եւ նորից վերադարձել են Երեւան կամ Դուբայ: Այդպես է տարածքը, աշխարհագրությունը ներկայացված եղել»:
Կարդացեք նաև
«Ընտրական օրենսգրքի» նախագիծը երկրորդ ընթերցմամբ եւ ամբողջությամբ ընդունվեց 82 կողմ ձայներով:
Հռիփսիմե ՋԵԲԵՋՅԱՆ
