«Որքան գիտեմ՝ հինգ մահվան դեպք է գրանցվել, այն էլ՝ պատվաստանյութի հետ ուղիղ կապն ապացուցված չէ այս պահին։ Որեւէ պատվաստանյութ չի կարող զերծ լինել կողմնակի ազդեցությունից»,-խորհրդարանում լրագրողների հետ զրույցում այսօր անդրադառնալով հարցին, թե ինչո՞ւ է ՀՀ ներկրվել կորոնավիրուսի դեմ «AstraZeneca» տեսակի պատվաստանյութը, եթե դրանից մահեր են գրանցվում, իսկ եվրոպական մի շարք երկրներ հրաժարվել են այն կիրառել՝ ասաց «Իմ քայլի» պատգամավոր, ԱԺ առողջապահության եւ սոցիալական հարցերի հանձնաժողովի նախագահ Նարեկ Զեյնալյանը։
Նա շեշտեց․ «Բոլոր պատվաստանյութերն էլ ունեն որոշ կողմնակի ազդեցություններ, եւ մահերի՝ պատվաստանյութի ներարկման հետ կապը դեռ պետք է ապացուցվի։ Մի քանի երկիրը հրաժարվել է այն ներարկել մինչեւ 55 տարեկան անձանց, սակայն մինչեւ 55-ից բարձր տարիքի անձինք պատվաստվում են։ Վստահեցնում եմ, որ ՀՀ-ն առաջիկայում այլ արտադրողներից եւս պատվաստանյութ ձեռք կբերի»։
Լուիզա ՍՈՒՔԻԱՍՅԱՆ
