«Պատվաստանյութն արդեն ձեռք է բերվել, ռիսկային խմբերի անձինք արդեն հերթագրվում են։ Պահելով կանոնները, կարծում եմ, խնդիր չենք ունենա քարոզարշավի ժամանակ»,-խորհրդարանում լրագրողների հետ ճեպազրույցում այսօր անդրադառնալով հարցին, թե կորոնավիրուսով վարակման թվերի աճի պայմաններում իշխանությունն ինչպե՞ս է պատկերացնում քարոզարշավի անցկացումը՝ ասաց «Իմ քայլի» պատգամավոր, ԱԺ առողջապահության եւ սոցիալական հարցերի հանձնաժողովի նախագահ Նարեկ Զեյնալյանը։
Նկատառմանն ի պատասխան, որ վարչապետ Նիկոլ Փաշինյանն արդեն իսկ մարզային այցերով քարոզարշավ է անում՝ առանց հակահամաճարակային կանոնները պահելու, Զեյնալյանը նշեց․ «Դա քարոզարշավ չէ, դրանք նրա մարզային այցերն են»։
Զեյնալյանի խոսքով՝ կորոնավիրուսի թվերը սկսել են աճել դեռեւս մեկ ամիս առաջ, եւ դա պայմանավորված չի վարչապետի այցերով․ «Արվում է առավելագույնը, որպեսզի կառավարելի լինի կորոնավիրուսի տարածումը»։
Կարդացեք նաև
Նարեկ Զեյնալյանը շեշտեց՝ այս պահին մտավախություն չկա․ «Եթե լինի իրավիճակ, որ կարիք լինի կանգնեցնելու ընտրական գործընթացը, գուցե եւ այդ քայլին գնանք, բայց այս պահին մտավախություն չկա, կանխատեսումներ չենք անում»։
Լուիզա ՍՈՒՔԻԱՍՅԱՆ
