Կայացվել է որոշում, որ «AstraZeneca» պատվաստանյութը Հայաստանում շարունակելու է կիրառվել: Այս մասին այսօր կառավարության նիստից հետո այսօր լրագրողների հետ զրույցում ասաց ՀՀ առողջապահության նախարար Անահիտ Ավանեսյանը՝ նշելով, որ ուշադրությամբ հետեւում են COVID-19 վարակի դեմ պատվաստանյութերի միջազգային եզրակացություններին:
«Մենք ուշադրությամբ հետեւում ենք բոլոր այն գործընթացներին, որոնք տեղի են ունենում «AstraZeneca»-ի եւ մյուս բոլոր պատվաստանյութերի հետ կապված: Այո, մենք այն ներմուծելու ենք, որոշումն այդպիսին է»,- ասաց նախարարը:
Նրա խոսքով, ՀՀ-ի պաշտոնատար անձանց մեջ կան մարդիկ, որոնք գտնվում են խոցելի խմբում եւ պատվաստվել են. «Պաշտոնատար անձինք, որոնք կցանկանան հրապարակել իրենց պատվաստման ընթացքը եւ այլ տեղեկություններ կհրապարակեն, բայց շատ երկրներում հանրային դեմքերը փորձում են ի աջակցություն պատվաստման գործընթացի` հանրայնացնել իրենց պատվաստվելը, բայց բժշկական գաղտնիքն այլ անձանց կողմից չի կարող հրապարակվել: Խոցելի խմբում են՝ քրոնիկական հիվանդություն ունեցող անձինք, մեծահասակները, եւ նորմալ է՝ կան պաշտոնատար մարդիկ, որոնք այդ խոցելի խմբերում են»:
Անահիտ Ավանեսյանը նաեւ անդրադարձավ զոհված զինծառայողների փորձանմուշների գործընթացին՝ նշելով, որ վերջին 2-3 շաբաթների ընթացքում ՌԴ-ի, Հոլանդիայի մասնագետների հետ համատեղ իրականացնում են այդ բարդ փորձանմուշների քննությունը. «Մեկ օրինակ բերեմ՝ մի նմուշը 7-րդ անգամից, որոշակի մշակում անցնելուց հետո հնարավոր եղավ նույնականացնել»,-ասաց Անահիտ Ավանեսյանը:
Կարդացեք նաև
Լուսինե ԲՈՒԴԱՂՅԱՆ
