«Սիրելի լրագրողներ, սիրելի բառը հատուկ եմ օգտագործում, ուզում եմ, որ մենք փոխադարձ իրոք լինենք սիրելի»,-ասուլիսն այսպես սկսեց ԿԳՄՍ նախարար Վահրամ Դումանյանը` ներկայացնելով 100-ամյա պաշտոնավարման արդյունքները:
Ի թիվս այլնի, նա մասնավորապես անդրադարձավ վերանայման փուլում գտնվող «Կրթության զարգացման 2021-2025 թթ ռազմավարությանը, որի աշխատանքներն առկախվել էին պատերազմի պատճառով, «Լավագույն ուսանող» մրցույթին, գիտության ոլորտի բարեփոխումներին, «Արցախի հետ համագործակցության ծրագիր-2021» մրցույթին, հանրակրթական հաստատությունների ընտրության կարգին եւ այլ հարցերի:
Պատասխանելով «Ա1+»-ի հարցին Նիկոլ Փաշինյանի` բուհերի շենքները կենտրոնում վաճառելու եւ Երեւանից դուրս ակադեմիական քաղաք հիմնելու մասին, ԿԳՄՍ նախարարը նշեց. «Ի՞նչ ենք թողնելու մեր երեխաներին… Թողնելու ենք բուհեր ու լավ բուհեր, դա մեր մեծագույն ցանկությունն է, ունեցել ենք գիտություն, կրթություն եւ այլն: Անցյալ ժամանակով մենք ամեն ինչ անում ենք, որպեսզի, դուք դա ասեք ներկա շարունակականով, մենք ունենք այն, ինչ ունենք, պահպանենք մեր եղածը: Թույլ չտանք անկում: Երկրորդը, որ մեր տեսլականն է, պետք է զարգացնել, բերել որակական այլ մակարդակի:
Վստահեցնում եմ` բուհերի շենքային կառույցներին որեւէ վտանգ չի սպառնում: Անհոգ եղեք, նման որոշում չկա… Հիմա կասեք՝ բա ի՞նչ կա…Կա գաղափար: Շենքը դրեք մի կողմ, խնդիրը շենքը չէ: Խնդիրը նոր շենքն է, նոր քաղաքն է, նոր կոմունիկացիաներն են, նոր կամպուսներն են:; Խնդիրը ձեւի եւ բովանդակության համապատասխանությունն է: Ձեւը արտաքինն է, բովանդակությունը` բուհը, բարձրագույն կրթությունը: Մենք չենք կարող «նկուղային» պայմաններում ժամանակակից բարձրագույն կրթություն ապահովել:
Կարդացեք նաև
Գաղտնիք չէ, որ սկսած սանիտարահիգիենիկ պայմաններից, լսարանային մակերեսներից, լսարանների ժամանակակից դասախոսություններ եւ ելույթներ, սեմինարներ, տարբեր գործընթացներ կազմակերպելուց, տեխնիկական հագեցածությունից, հանրակացարանային, սպորտային համալիրներից, սննդի կազմակերպման կառույցներից, համալիր մոտեցում չկա»:
Նախարարը հավելեց. «Այն գաղափարը, որ շրջանառվում է մամուլում, շատ կուզենամ, որ դառնա իրականություն»:
Գոհար ՀԱԿՈԲՅԱՆ
