Սյունիքի մարզի Շուռնուխ համայնքի բնակիչներից մեկի 13 կովերը մոտ երկու շաբաթ առաջ անցել են Ադրբեջանի վերահսկողության տակ հայտնված տարածք ու անհետացել են։ Ըստ Շուռնուխի վարչական շրջանի գյուղապետ Հակոբ Արշակյանի, դիմել են հայկական սահմանապահ ուղեկալի պետին, ռուսների հետ կովերի հետքերով գնացել են մինչև մոտակա գյուղ, որն ադրբեջանցիների վերահսկողության տակ է, և անասունների ոտնահետքերով տեսել են, որ կովերը մինչև այնտեղ հասել են։ Այդ բնակչի տունը գյուղից 1 կմ հեռավորության վրա է, եւ այնտեղ առանձին տնտեսություն է վարում։ Իսկ ադրբեջանական հսկողության տակ անցած տարածքի համեմատությամբ, բնակչի տնտեսությունը մոտ 300 մետր է հեռու։
«Ասացին՝ մեր բայրամն է, նշում ենք, հետո եկեք՝ կտանք։ Բայց էդ հետոն էդպես էլ չեղավ։ Ռուս սահմանապահներին ասել են՝ կգտնենք, կվերադարձնենք»,–ասաց Հակոբ Արշակյանը։
Ի դեպ․ ամիսներ առաջ, երբ Շուռնուխում էինք, Հակոբ Արշակյանը գյուղացիներին տեղեկացրել էր, որ պետությունը «էլեկտրական հովիվներ» (հոսանքով փշալարեր, որոնց հպվելուց անասունները չեն վնասվում եւ չեն անցնում այլ տարածք–Ա․Դ․) է տեղադրելու գյուղում։ Այսօր մեր հեռախոսազրույցի ընթացքում Հակոբ Արշակյանն ասաց, որ գյուղի մի մասում արդեն տեղադրված է։ Սպասում են հաջորդ «էլեկտրական հովիվին», որը շուտով կհասնի գյուղ։
Կարդացեք նաև
Իսկ մեր այն դիտարկմանն ի պատասխան, թե դրանք օգնո՞ւմ են խնդրի կարգավորմանը՝ Հակոբ Արշակյանն ասաց․ «Հիմա, եղանակային այս պայմաններում գուցե օգնում են, բայց որ եղանակները տաքանան, ճանճ կամ մժեղ նստի անասունի վրա, ոչ մի բանի չի նայելու։ Լար-բան պոկելով կանցնի՝ ուր պետք է»,–ասաց Արշակյանը։
Ի դեպ, վերջերս Սյունիքի մարզպետ Մելիքսեթ Պողոսյանը սահմանամերձ Արավուս գյուղում էր։ Գյուղացիները մարզպետին դիմելով՝ նշեցին, որ գյուղին պետք են «էլեկտրական հովիվներ»։ Մարզպետը խոստացավ դիմել կառավարությանը։
Արմեն ԴԱՎԹՅԱՆ
