«Դատարանների շրջափակում, դատավորներին «վնգստացող» անվանել․․․ բիրտ, կոպիտ ձեւերով փոխեցին բարձրագույն դատարանի՝ ՍԴ-ի անդամներին։ ՍԴ-ի որոշումը, կարելի է ասել, իշխանության քիմքին հարմար դատավորները կայացրին, ուստի իշխանությունն այլեւս չի կարող ասել, թե դա կեղծիք է»,-«Հայելի» մամուլի ակումբում լրագրողների հետ հանդիպմանն այսօր անդրադառնալով ՀՀ սահմանադրական դատարանի կողմից ՔՕ 300.1 հոդվածը (սահմանադրական կարգը տապալելը) հակասահմանադրական ճանաչելու փաստին՝ ասաց ԱԺ պետաիրավական հարցերի հանձնաժողովի նախկին նախագահ, ԱԺ ՀՀԿ-ական նախկին պատգամավոր Հովհաննես Սահակյանը։
Ռոբերտ Քոչարյանի հանդեպ քրեական գործի առնչությամբ նա նշեց․ «Այդ քրեական գործը շարունակելն անգամ ամոթ է, պետք է մտածել նոր բան «կարելու» մասին, կամ էլ նամուս ունենան, ներողություն խնդրեն, եւ այս ամենն ավարտվի։ ՍԴ-ն այս որոշմամբ մնաց իր բարձունքում։ Քանի դեռ չեն բացահայտվել մարտի 1-ի տասը զոհերի սպանության հանգամանքները, մարտի մեկի գործի լինելու մասին խոսել հնարավոր չէ։ Իշխանությունը փուչիկ էր փչել այս երեք տարում»։
Լուիզա ՍՈՒՔԻԱՍՅԱՆ
