«Ձվի գնի բարձրացումն ունի նաեւ օբյեկտիվ պատճառ. համաշխարհային շուկայում ձուն թանկացել է»,-այսօր ասաց տնտեսական մրցակցության պաշտպանության պետական հանձնաժողովի (ՏՄՊՊՀ) նախագահ Գեղամ Գեւորգյանը: Նրա խոսքով, հաշվի առնելով հասարակության մտահոգություններն ու այս հարցով հետաքրքրվածությունը հանձնաժողովը սկսել է ուսումնասիրություն, բայց դա մեկ օրվա գործ չէ. «Գնի մասով խոսել ենք տնտեսվարող սուբյեկտների հետ, որոնք հայտնել են, որ արտադրական ծավալները մեծացրել են եւ այսօրվանից սկսած ավելի շատ ձու կմատակարարեն եւ Զատիկից առաջ գինը կիջնի»:
ՏՄՊՊՀ նախագահի խոսքով, տնտեսվարողները դեֆիցիտի պատճառներից մեկն էլ նշել են ճտերին ուշ բերելը, ինչի հետեւանքով ձվադրման տարիքի չեն եղել. «Հիմա մտել են ձվադրման, արտադրական ծավալները կբարձրանան եւ գինը կիջնի: Այսինքն, ըստ տնտեսվարողներին, օբյեկտիվ այս մի խնդիրը վերացել է»:
Գեղամ Գեւորգյանն ասաց, որ եթե համաշխարհային գները բարձրանան Հայաստանում էլ ձուն կթանկանա:
Լուսինե ԲՈՒԴԱՂՅԱՆ
