ԱԺ տնտեսական հարցերի մշտական հանձնաժողովի նախագահ Բաբկեն Թունյանի ֆեյսբուքյան գրառումը
ՊՂՆՁԻ, ՀԱՆՔԱՔԱՐԻ և ԽՏԱՆՅՈՒԹԻ ՄԱՍԻՆ
🔺 Հայաստանից մաքուր պղինձ չի արտահանվում։ Հայաստանից արտահանվում է ԱՏԳ ԱԱ 2603 կոդով ապրանքը, որը մաքսային վիճակագրության մեջ կոչվում է ՊՂՆՁԻ ՀԱՆՔԱՔԱՐ ԵՎ ԽՏԱՀԱՆՔ։ Անգլերեն՝ copper ores and concentrates:
🔺 2020 թվականին Հայաստանից արտահանվել է 509.8 հազար տոննա, որի մաքսային արժեքը կազմել է 604.4 մլն դոլար։ Ըստ այդմ՝ 1կգ-ի արժեքը կազմել է ընդամենը 1.2 դոլար։
Կարդացեք նաև
Մաքուր պղնձի արժեքը մի քանի անգամ բարձր է։ Օրինակ, նույն 2020 թվականին Հայաստան ներմուծված 76 հազար տոննա պղնձալարի (ԱՏԳ ԱԱ 7408) մեկ կգ-ի մաքսային արժեքը կազմել է 4.9 դոլար։ Անգամ ջարդոնի տեսքով պղինձն է (ԱՏԳ ԱԱ 7404) իր արժեքով անհամեմատ բարձր՝ 1կգ-ն 4.6 դոլար։
🔺 Համեմատեցի՞ք 1.2 դոլարը 4.6 դոլարի հետ։
Սա նշանակում է, որ եթե արտադրական ցիկլը խորացվեր, և մենք արտահանեինք ոչ թե խտանյութ, այլ պղինձ, մեր տնտեսությունը դրանից միանշանակ կշահեր։ Դրա համար անհրաժեշտ է պղնձաձուլարան, որը կմշակի 500 հազար տոննա խտանյութը և կստանա ավելի բարձր արժեք ունեցող տարեկան մոտ 125 հազար տոննա պղինձ։
Մենք ունեցել ենք խոշոր պղնձաձուլարան` Ալավերդու պղնձաձուլարանը, որն այս պահին չի շահագործվում:
Ինչ վերաբերում է Զանգեզուրի պղնձամոլիբդենային կոմբինատին, այն պղինձ չի արտադրում։ ԶՊՄԿ-ն Հայաստանի ամենամեծ բաց հանքում արդյունահանում է մոլիբդենի և պղնձի հանքաքար, որի վերամշակումից ստացվում են պղնձի և մոլիբդենի խտանյութեր։
🔺 Վարչապետն այսօր խոսել է սրա` արտադրական շղթայի խորացման անհրաժեշտության մասին։ Խտանյութի փոխարեն հնարավորինս վերջնական արտադրանք ստանալու և արտահանելու մասին։
Կարծում եմ՝ բոլորը կհամաձայնեն, որ դա անհրաժեշտություն է, և ոչ միայն պղնձի առումով։
Իսկ ասելիքի բուն իմաստը թողած՝ կենտրոնանալ «հանքաքար» բառի վրա, նշանակում է չտարբերակել կարևորը անկարևորից։
Լուսանկարում՝ պղնձի խտանյութ
