«Գործը, որը պետք է Հայաստանում արդարություն վերականգներ և բացառեր այլևս Մարտի 1-ը որպես իրադարձություն, դրա կրկնությունը, այլևս տապալված է և այն տապալված է այս իշխանությունների անպատասխանատվության, հեղափոխության հնարավորությունների, բարեփոխումների վերաբերյալ բացարձակ զրո պատկերացում ունենալու արդյունքում։ Այսօրվա տեղի ունեցածի միակ մեղավորը այսօրվա իշխանությունն է«,- «Առաջին լրատվական»-ի հետ զրույցում ասաց իրավապաշտպան Նինա Կարապետյանցը՝ անդրադառնալով ՍԴ որոշմանը։
«Ես «շնորհավորում» եմ այս իշխանությանը, որ նրանք արեցին այն, ինչ որ Սերժի ժամանակ հնարավոր չեղավ անել։ Սերժի ժամանակ հնարավոր չեղավ տապալել այս գործը, բայց Նիկոլ Փաշինյանի հեղափոխական թիմը իր չբարեփոխումներով կարողացավ ստեղծել իրավիճակ, որտեղ ամենակարևոր պատմական իրադարձություններից մեկը, որով դատավարությունը պետք է երաշխիքներ ստեղծեր հետագայում դրա կրկնության բացառումը, ուղղակի տապալվեց։ Ենթադրում եմ, որ հաջորդը լինելու է Հոկտեմբերի 27-ի գործի տապալումը։ Այնպես որ, այս իշխանությունը կարող է հպարտանալ իր աննախադեպությամբ։ Իրենք կարող են հպարտանալ, որ այն, ինչ Սերժը չկարողացավ անել, իրենք արեցին»,- ասաց իրավապաշտպանը։
Սոնա ՀԱՐՈՒԹՅՈՒՆՅԱՆ
Կարդացեք նաև
Հոդվածն ամբողջությամբ՝ «Ժամանակ» թերթի այս համարում
