Սահմանադրական դատարանն այսօր հրապարակեց ՀՀ երկրորդ նախագահ, սահմանադրական կարգը տապալելու, ինչպես նաեւ՝ առանձնապես խոշոր չափերով կաշառք ստանալու մեջ մեղադրվող Ռոբերտ Քոչարյանի պաշտպանների՝ ՍԴ-ին հասցեագրված դիմումի որոշումը։
Հիշեցնենք, որ դիմումի հիման վրա քննվում էր 300.1 հոդվածի(սահմանադրական կարգը տապալելը․-խմբ․)՝ սահմանադրությանը համապատասխանության հարցը։
Ինչպես ընթերցեց ՍԴ նախագահ Արման Դիլանյանը, ՍԴ-ն որոշեց 300.1 հոդվածը ճանաչել 78-րդ եւ 79-րդ հոդվածներին հակասող եւ անվավեր․ «Որոշումը վերջնական եւ հրապարակման մեջ է մտնում հրապարակման պահից»։
Կարդացեք նաև
Նիստի ավարտին լրագրողների հետ զրույցում Ռոբերտ Քոչարյանի փաստաբաններից Արամ Վարդեւանյանը նշեց, որ այս որոշմամբ ՍԴ-ն արձանագրեց՝ 300.1 հոդվածը սահմանադրությանը հակասող է, եւ անվավեր է ճանաչվել․ «Ցավում եմ, որ այդ ամենը տեւեց երեք տարի, իրավական գործընթացների դաժան ու տանջալի արդյունք դարձավ։ Ի վերջո, ճշմարտությունը հաղթեց։ Մենք եւ Ռոբերտ Քոչարյանն ասում էինք, որ այդ չարաբաստիկ հոդվածը որոշակի չէ։ Ափսոս, որ 2021թ․-ին միայն սա արձանագրվեց։ Սա նշանակում է, որ 300.1 հոդվածով ինչպես ի սկզբանե չէր կարող լինել քրեական հետապնդում, այնպես էլ հիմա քրեական հետապնդումը 300.1 հոդվածով դադարեցվելու է։ ՍԴ որոշումը կհրապարակվի երեք օրում, ընթացակարգն այդպիսին է»։
Արամ Վարդեւանյանը հավելեց, որ Ռոբերտ Քոչարյանի եւ մյուսների գործը քննող դատավոր Աննա Դանիբեկյանը պետք է դադարեցնի 300.1 հոդվածով քրեական հետապնդումը․ «Առաջիկա նիստը նշանակված է, պարզապես 300.1 հոդվածի մասով քրեական հետապնդում այլեւս չկա»։
Հիշեցնենք, որ սահմանադրական կարգի տապալման համար մեղադրվում են նաեւ ՀԱՊԿ նախկին գլխավոր քարտուղար Յուրի Խաչատուրովը, նախկին ՊՆ Սեյրան Օհանյանը, նախկին փոխվարչապետ Արմեն Գեւորգյանը(սահմանադրական կարգի տապալմանն օժանդակել․-խմբ․)։
Լուիզա ՍՈՒՔԻԱՍՅԱՆ
