Փաստաբան Լեւոն Բաղդասարյանն այսօր լրատվամիջոցների հետ հանդիպման ժամանակ անդրադարձավ արցախյան 44-օրյա պատերազմի հետեւանքով հակառակորդի մոտ հայտնված հայ ռազմագերիների խնդրին: «Անչափ կարեւորում եմ գերիների հարցը: Ամեն ինչ հնարավոր է վերականգնել եւ իրականացնել ցանկացած գործառույթ, սակայն գերիների խնդրի լուծման ուշացումը կարող է կործանարար լինել: Գերիները ոչ միայն սերունդ տվող մեր եղբայրներն են, այլ այն մարդիկ, ովքեր ծանր պահին, երբ դրված էին ցեղասպանվելու վտանգը, կամավորագրվեցին դա հնարավորինս կանխելու: Հետեւաբար, այսօր յուրաքանչյուրս պարտավորություն ունի իրավական եւ տարբեր հարթակներում բարձրացնելու նրանց մեկ ժամ շուտ հետ բերելու հարցը: Դա առաջին հերթին պետք է անի պետական լիազոր մարմինը՝ ի դեմս ՀՀ կառավարության», – ասաց նա եւ ընթերցեց այդ առիթով իր պատրաստած զեկույցը, որում նշված է, որ Հայաստանի Հանրապետությունը իրավունք ունի անվերապահորեն պահանջելու, որ Ադրբեջանը կատարի եռակողմ հայտարարությամբ ստանձնած իր պարտավորությունները:
Հաջորդիվ Լեւոն Բաղդասարյանն անդրադարձավ, օրենքի ուժով ԲԴԽ լիազորությունների ավելացմանը, ինչը նրա գնահատմամբ անթույլատրելի է եւ մեկ քայլ նահանջ: «Նախկինում դատավորների համար որպես կարգապահական մահակ արդարադատության նախարարությունն էր: Հետո օրենքը վերանայեցին, եւ ստեղծվեց մի հանձնաժողով, որը անդրադառնում էր դատավորների վարքի կանոններին ու գործողություններին: Տարիներ առաջ ստեղծվեց Բարձրագույն դատական խորհուրդը, բայց միեւնույն ժամանակ ԲԴԽ-ին տրվեց ընդամենը անկախ դիտորդի լիազորություն եւ իրավունք վերապահվեց պետական լիազոր մարմնին ի դեմս Արդարադատության նախարարության եւ դատավորների ընդհանուր ժողովի էթիկայի հանձնաժողովի, որ վերջիններիս դիմումի հիման վրա ԲԴԽ-ն որպես դատարան պետք է քններ նրանց վարքի կանոնները:
Այս օրինագիծը, որին օրենքի ուժ է տրվում, կարծում եմ, մեկ քայլ նահանջ է բոլոր բացասական հետեւանքներով: Այսինքն, դատավորի առերեւույթ անկախությունը, որ մենք տեսնում ենք, ԲԴԽ-ին նման լիազորություն տալով՝ դատավորին կաշկանդելու է բոլոր բացասական հետեւանքներով: Կարծում եմ, պետք է վերանայվի այս իրավանորմը, որովհետեւ ցանկացած հետքայլ, նահանջ ուղղակի անդրադառնալու է հասարակության վրա»,-ասաց փաստաբանը:
Աշոտ ՀԱԿՈԲՅԱՆ
