ՀՀ կառավարության 3-րդ մասնաշենքի մոտ հավաքված յոթ ցուցարար-քաղաքացիներ բերման ենթարկվեցին շենքի դիմացի այգում կանգնելու համար:
ՀՅԴ երիտասարդական կազմակերպության հրապարակած տեսանյութում ցուցարար քաղաքացիները ցույց են տալիս, որ կառավարության շենքի տանիքում դիպուկահարներ են, ոստիկանները քաղաքացիներին թույլ չեն տալիս մոտենալ շենքին:
Նշենք, որ կառավարության շենքում քննարկում էր տեղի ունենում, որին մասնակցում էր նաև ՀՀ վարչապետ Նիկոլ Փաշինյանը: Քաղաքացիները, որոնց թվում էին նաև ՀՅԴ երիտասարդական կազմակերպության անդամներ, հավաքվել էին, որ իրենց կարծիքը հայտնեն նրա մասին:
Կարդացեք նաև
Ոստիկանները նրանց անընդհատ հետ էին հրում՝ թույլ չտալով մոտենալ կառավարական մասնաշենքին ու պատճառաբանում. «Անվտանգությունն ենք պահպանում»: Ցուցարարները նրանց դիմելով հարցրին. «Ո՞ւմ անվտանգությունը։ Դուք անվտանգ ե՞ք, պարոն մայոր, մենք անվտանգ չենք»: Ցուցարարները հայտարարեցին՝ այստեղ մենք կանգնում ենք, սա մեր քաղաքն է, որտեղ ուզում ենք, այնտեղ էլ կանգնում ենք:
Ցուցարարները մտահոգություն հայտնեցին, որ Նիկոլ Փաշինյանի՝ ամեն հարյուր մետր տեղաշարժի համար նման իրավիճակ է առաջանում:
ՀՅԴ ԳՄ նախագահ Սիմոն Սիմոնյանը վրդովվեց. «Չենք կարող այստեղ կանգնել, ինչ է թե՝ այս դավաճանը պիտի երթա՞: Մեր նպատակն է ևս մեկ անգամ հիշեցնելը, որ ինքը հանգիստ չի ունենալու, տեղ չի ունենալու այս երկրում»:
Ֆեյսբուքյան ուղիղ եթերում ավելի ուշ ցուցարար-երիտասարդները հայտնեցին, որ դիպուկահարներն արդեն իջել են կառավարական մասնաշենքի տանիքից, ոստիկանությունը տեղի է տալիս, և սա իրենց թույլ է տալիս մտածելու, որ Նիկոլ Փաշինյանը կառավարական շենքի ետնամուտքից թաքուն դուրս է եկել:
Տաթև ՀԱՐՈՒԹՅՈՒՆՅԱՆ
