«ԲՀԿ-ն մասնակցելու է իր առանձին ցուցակով, որը, բնականաբար, գլխավորելու է Գագիկ Ծառուկյանը։ Ինչ վերաբերում է ընտրակարգի ընտրությանը, ապա այստեղ խաղն իշխանության դաշտում է, իրենք են սահմանել խաղի այդ կանոնը»,-խորհրդարանում լրագրողների հետ ճեպազրույցում այսօր անդրադառնալով Նիկոլ Փաշինյանի այն հայտարարությանը, որ հունիսի քսանի ընտրությունների օրը պայմանավորվելու համատեքստում իշխանությունը կողմ է ընտրական օրենսգրքում վարկանիշային ընտրակարգի փոփոխությանը՝ ասաց «Բարգավաճ Հայաստան» խմբակցության պատգամավոր Նաիրա Զոհրաբյանը։ Լրագրողները հետաքրքրվեցին՝ Փաշինյանն ասաց, որ ԲՀԿ-ն եւ ԼՀԿ-ն ԸՕ-ի փոփոխության հարցը թողել են խորհրդարանական մեծամասնության որոշմանը՝ այդպե՞ս է։
Նաիրա Զոհրաբյանը պատասխանեց․ «ԲՀԿ-ն մասնակցելու է ընտրություններին, եւ մեր համար շատ ավելի կարեւոր է, որ ընտրությունները լինեն ազատ եւ արդար, որ որեւէ վարչական ռեսուրս չկիրառվի, ինչի ահազանգերը մենք ստանում ենք։ Սա շատ ավելի կարեւոր է, իսկ ընտրակարգի առումով իշխանությունն ունի բացարձակ մեծամասնություն խորհրդարանում, եւ, բնականաբար, իր ձայների մեծամասնությամբ կորոշի ընտրակարգը։ Մեր համար այս պահին առաջնային խնդիրն այն է, որ ներքաղաքական լարվածությունը հանգուցալուծվի, իսկ դրա լեգիտիմ ճանապարհն արտահերթ ընտրություններն են։ Հուսամ ընդդիմադիրները քաղաքական կոնսենսուսի կգան, որպեսզի վերահսկենք, որպեսզի որեւէ մեկը վարչական ռեսուրս չկիրառի։ ԲՀԿ-ն ունի բավարար վստահություն, որպեսզի երկու ընտրակարգերի դեպքում էլ ստանա վստահության քվե»։
Կարդացեք նաև
Լուիզա ՍՈՒՔԻԱՍՅԱՆ
