Ճանապարհային երթեւեկության ոլորտում մի շարք կարգավորումներ սահմանելու համար հստակեցումներ են կատարվել «Իմ քայլը» խմբակցության պատգամավոր Վաղարշակ Հակոբյանի հեղինակած՝ ՏԻՄ մասին ՀՀ օրենքում փոփոխությունների օրինագծով։ ԱԺ լիագումար նիստում այսօր պատգամավորը զեկուցեց՝ օրինագիծը սահմանում է, թե որ հատվածում որ կառույցն է պատասխանատու ճանապարհային երթեւեկության նշանների տեղադրման համար։ «Օրենսդրական փոփոխությունը սահմանում է, որ համայնքների ղեկավարները, տարածքային կառավարման եւ ենթակառուցվածքների նախարարության հետ համաձայնեցնելուց հետո, պետք է ավագանու հաստատմանը ներկայացնեն համայնքային երթեւեկության ճանապարհներին երթեւեկության կազմակերպման սխեմա, որը անվտանգության տեսանկյունից համաձայնեցվում է ոստիկանության հետ»,-նշեց Վաղարշակ Հակոբյանը։
Նա հույս հայտնեց, որ այս փոփոխությամբ համայնքներում ճանապարհային երթեւեկության նշանների տեղադրման հետ կապված հարցերը լուծումներ կստանան։
«Իմ քայլի» պատգամավոր Նիկոլայ Բաղդասարյանը հետաքրքրվեց՝ ինչո՞ւ օրինագիծը չի վերաբերում Երեւանին, այլ շոշափում է միայն համայնքները։
Վաղարշակ Հակոբյանը պատասխանեց․ «Երեւանում հարցերը կարգավորվում են Երեւանի մասին օրենքով։ Եկեք ընդունենք, որ Երեւանում ճանապարհային նշանների հետ կապված վիճակն այնպիսին չէ, ինչպիսին գյուղական համայնքներում»։
Կարդացեք նաև
Ինչ վերաբերում է հարցին, թե նախկինում որ մարմինն է համայնքներում պատասխանատու եղել ճանապարհային երթեւեկության կազմակերպման համար, Հակոբյանը տեղեկացրեց՝ օրենքում ոչ հստակ շարադրում կա․ «Մի անգամ վթար էր տեղի ունեցել ճանապարհային նշանի բացակայության պատճառով, եւ ոստիկանությունը գլուխ էր կոտրում՝ հասկանալու համար, թե որ մարմինն է մեղավոր, որ ճանապարհային նշանը տեղադրված չէր։ Պարզել այդպես էլ չհաջողվեց։ Օրենքի անհստակության պատճառով այդպես էլ չպարզվեց՝ համա՞յնքն էր պատասխանատու, ոստիկանությո՞ւնը, թե տարածքային կառավարման նախարարությունը։ Որոշ համայնքներում ֆինանսի խնդիր չկա, բայց ճանապարհային նշաններ էլ չկան, որովհետեւ չկա պատասխանատու մարմին։ Իսկ այս օրենքով մենք լիազոր մարմին ենք դարձրել տարածքային կառավարման նախարարությանը։ Հայաստանի մի քանի խոշոր քաղաքներում խնդիրը կա՝ նշանները տեղադրված չեն։ Գյուղական համայնքներում վիճակն իրոք տխուր է։ Կան համայնքներ, որտեղ նշաններն իսպառ բացակայում են»։
Հավելենք, որ կառավարության եզրակացությունն օրինագծի վերաբերյալ դրական է։
Լուիզա ՍՈՒՔԻԱՍՅԱՆ
