ՀՀ ԱԺ-ն երկրորդ ընթերցմամբ և ամբողջությամբ ընդունեց կառավարության ներկայացրած Հակակոռուպցիոն կոմիտեի մասին և կից ներկայացված օրենքների նախագծերի փաթեթը: Ըստ փաթեթի՝ առաջարկվում է ստեղծել նոր քննչական մարմին՝ Հակակոռուպցիոն կոմիտե՝ ՀՀ Քրեադատավարության օրենսգրքով իր ենթակայությանը վերապահված ենթադրյալ կոռուպցիոն հանցագործությունների մինչդատական քրեական վարույթի կազմակերպման ու իրականացման իրավասությամբ:
Որոշվել է նաև լուծարել Հատուկ քննչական ծառայությունը: ՀՔԾ քննիչները ժամանակավորապես կնշանակվեն որպես Հակակոռուպցիոն կոմիտեի քննիչներ՝ նախքան նոր կոմիտեի ծառայողների մրցույթի իրականացումը և պաշտոնի նշանակվելը: Այս ընթացակարգով կնշանակվի 20 քննիչ:
«Թրանսփարենսի Ինթերնեյշնլ» հակակոռուպցիոն կենտրոնի ծրագրերի համակարգող Վարուժան Հոկտանյանը «Ժամանակ»-ի հետ զրույցում ասաց, որ պետք է սպասել ու տեսնել, թե ինչպես է աշխատելու այս նոր կառույցը, քանի որ մի բան է կառույց ստեղծելը, այլ բան է, թե ինչպես է այն աշխատելու և դրսևորվելու։ «Ամեն ինչ կախված է նրանից, թե, ի վերջո, կլինի՞ քաղաքական կամք լրջորեն պայքարել կոռուպցիայի դեմ, թե՞ դա կօգտագործվի քաղաքական նպատակներով՝ բացահայտելու համար միայն նախկինների կոռուպցիան։ Եթե այս ամենը արվի պատշաճ կերպով, ապա մասնագիտացված կառույցներ ունենալը շատ դրական է»,- ասաց Հոկտանյանը։
Դիտարկմանը՝ կասկածներ կա՞ն, որ Հակակոռուպցիոն կոմիտեն կարող է միայն նախկինների դեմ աշխատել, Հոկտանյանը պատասխանեց․ «Ես նման նախադրյալներ տեսնում եմ։ Բայց դա չի նշանակում, որ չպետք է կիրառվի նախկինների դեմ, նախկինների կոռուպցիան բացահայտելու համար։ Իմ ասածն այն է, որ չպետք է խտրական մոտեցում ցուցաբերվի։ Ի վերջո, այսօր Հայաստանում կոռուպցիան չի վերացել, այնպես չէ, որ մնացել են միայն նախկինների կոռուպցիոն դրսևորումները։ Հետևաբար, կոմիտեն պետք է հնարավորություն ունենա արդյունավետ կերպով, օրենքի գերակայությունը ապահովելով աշխատել ու պատժել բոլոր տեսակի կոռուպցիոն երևույթները»։ Հոկտանյանը նաև ավելացրեց, որ ամեն դեպքում Հակակոռուպցիոն կոմիտեն հակակոռուպցիոն համակարգում շատ կարևոր մարմին է և կարևոր է, որ նորաստեղծ մարմինը սինխրոն աշխատի հակակոռուպցիոն մյուս մարմինների հետ՝ ունենալով նաև հանրային աջակցություն արդյունավետ կերպով հակակոռուպցիոն քաղաքականություն իրականացնելու համար։
Կարդացեք նաև
Սոնա ՀԱՐՈՒԹՅՈՒՆՅԱՆ
Հոդվածն ամբողջությամբ՝ «Ժամանակ» օրաթերթի այսօրվա համարում:
