«Փաստորեն, ձեր հայտարարություններում մենք ստիպված ենք հակասություններ փնտրել, եւ դրա մեղավորը դուք եք, որովհետեւ այս ընթացքում սուտը ստի վրա դնելով, սուտը ստով հերքելով՝ այլեւս հնարավոր չէ հասկանալ, թե որն է ճիշտը եւ սխալը։ Ե՞րբ է իշխանությունը դադարելու ստել, մանիպուլացնել եւ ստեղծել իրավիճակ, որում մարդիկ խճճվում են ստի մեջ»,-ԱԺ-կառավարություն հարցուպատասխանի ժամանակ այսօր ՀՀ վարչապետին նման հարց հղեց «Լուսավոր Հայաստանի» պատգամավոր Անի Սամսոնյանը՝ նկատի ունենալով այն փաստը, որ այսօր Փաշինյանը պարզաբանեց «ՍՈՒ-30» ինքնաթիռների կապված իրավիճակը։
Հատկանշական է, որ Նիկոլ Փաշինյանի փոխարեն ամբիոնին մոտեցավ փոխվարչապետ Տիգրան Ավինյանը, ինչը տեսնելով՝ Անի Սամսոնյանը ժպտաց։ Ավինյանը նշեց, որ Նիկոլ Փաշինյանն արդեն իսկ այսօր պարզաբանեց այդ հարցը, եւ ավելացնելու բան չկա։ Անի Սամսոնյանն արձագանքեց․ «Պարոն Ավինյան, հասկանում եմ՝ ծանրագույն բեռ է այլոց ստերի համար պատասխան տալը, ինչը հիմա փորձում եք անել, բայց նորից ասեմ՝ խաբել եք մարդկանց, «ՍՈՒ»-երը չեն ունեցել հրթիռներ, եւ դա պարզվել է պատերազմից հետո։ Թաքցրել եք, որ հրթիռներ չեն ունեցել։ Խորհուրդ տամ բարեկամաբար՝ սուտը տնաքանդություն է, ձեր իշխանությունը ստի վրա է հիմնված։ Կանգ առեք, ժողովուրդը մեղք է»։
Տիգրան Ավինյանը պատասխանեց․ «Գնահատելի է ձեր կարծիքը, բայց ձեր մեկնաբանությունները չափից շատ սուբյեկտիվ են ու որոշ դեպքերում քաղաքական լսողության բացակայությունը փաստերի խեղաթյուրման է բերում»։
Կարդացեք նաև
Լուիզա ՍՈՒՔԻԱՍՅԱՆ
