«Այո, կարծում եմ՝ առաջընթաց ունենք, բայց այս պահին դեռեւս իրականացվում են փորձագիտական բնույթի աշխատանքներ, որոնք շատ կարեւոր են՝ հարցին ճիշտ լուծում տալու համար»,-ԱԺ-կառավարություն հարցուպատասխանի ժամանակ այսօր խոսելով Արցախի հարցով նոյեմբերի իննի եռակողմ հայտարարությամբ ամրագրված՝ տարածաշրջանային ենթակառուցվածքների ապաշրջափակման մասին՝ ասաց ՀՀ փոխվարչապետ Մհեր Գրիգորյանը։
«Փոխվարչապետերի կազմով եռակողմ աշխատանքային խումբը մի քանի նիստ է արել, կան նաեւ ենթախմբեր, որոնցից մեկը ենթակառուցվածքների տեխնիկական բնույթի հետ կապված փորձագիտական աշխատանքներ է իրականացնում, մյուսը՝ տեխնիկական, մաքսային հարցերով է զբաղվում։ Հավելյալ փորձագիտական աշխատանքի կարիք կա, եւ ավարտին կխոսենք հնարավորությունների եւ հնարավոր որոշումների մասին»,-հավելեց նա։
Թե մասնավորապես ինչ տեսակի ենթակառուցվածքների մասին է խոսքը, Մհեր Գրիգորյանը նշեց․ «Հիմնականում քննարկվում է երկաթգծի ճանապարհի հարցը։ Սովետական ժամանակվա ենթակառուցվածքների վերականգման մասին է խոսքը՝ բոլոր հնարավոր ուղղություններով»։
Կարդացեք նաև
Լուիզա ՍՈՒՔԻԱՍՅԱՆ
