«Եղանակի պատճառով Վլադիկավկազի հատվածում 700-800 հայկական բեռնատարներ են կուտակվել։ Մեր վարորդները լքված են, անպաշտպան»,-ԱԺ լիագումար նիստում այսօր նման խնդիր բարձրաձայնեց անկախ պատգամավոր Արման Բաբաջանյանը։ «Օրեր առաջ մեր ՊԵԿ ներկայացուցիչը նրանց հետ ընդամենը հեռախոսով է խոսել եւ ասել, որ կմոտենա եւ խնդրին կծանոթանա, բայց վարորդները մնացել են լքված։ Կիրակի եւ դրանից առաջ Կաբարդինա-Բալկարիայի պաշտոնյաներն են մոտեցել, եւ սննդի հարցը լուծվել է այդ մակարդակով։ Ժամ առաջ պետք է միջամտել»,-հավելեց Արման Բաբաջանյանը։ Նրա խոսքով՝ անթույլատրելի է իրավիճակը, երբ քաղաքացիները լքված են պետության կողմից։
ՊԵԿ նախագահ Էդվարդ Հովհաննիսյանն արձագանքեց, որ վերջին մի քանի օրում եղանակային պայմանների պատճառով վերին Լարսի անցակետը ծանրաբեռնված է․ «Մի վարորդի մոտ գումարն է վերջացել, մյուսի մոտ՝ սնունդը։ Վարորդները տարբեր տեղերում են, եւ մեր ներկայացուցիչը մեծ ցանկության դեպքում հնարավորություն չունի այդքան վարորդի հանդիպել։ Նա մի քանի անգամ ինձ զեկուցում է իրավիճակը։ Ճիշտ չի պատկերացումը, որ ներկայացուցիչը պետք է սնունդ հասցնի վարորդներին։ Նա հնարավորության սահմաններում փորձում է վարորդների խնդիրները լուծել»։
Լուիզա ՍՈՒՔԻԱՍՅԱՆ
