«Դուք հերթական անգամ ընդգծում եք ձեր բացասական վերաբերմունքը Արմեն Գեւորգյանի հանդեպ: Ձեր վարքագծով`դուք օրինական դատարան չեք եւ չեք կարող լինել ինձ եւ Արմեն Գեւորգյանի համար»,- այսօր դատարանում դիմելով դատավորին`հայտարարեց նախկին փոխվարչապետ Արմեն Գեւորգյանի շահերի ներկայացուցիչ Էրիկ Ալեքսանյանը:
Դատարանը որոշեց նկատողություն հայտարարել Էրիկ Ալեքսանյանին`փետրվարի 23-ի նիստին «չարամտորեն չներկայանալու» համար: Մինչ այդ պաշտպանը պարզաբանել էր տվյալ նիստից իր բացակայության պատճառը, այն է`վերաքննիչ դատարանում նշանակված նիստը: Դատարանը պարզել էր, որ վերաքննիչ դատարանում նիստը չի կայացել, մինչդեռ պաշտպանն այդպես էլ նիստի չէր ներկայացել: Այսօր Էրիկ Ալեքսանյանը հավելեց, որ քննիչի հետ հանդիպում ուներ նշանակված: Դատավոր Աննա Դանիբեկյանը նկատեց`սույն գործով որոշում է կայացվել ամեն երեքշաբթի օրը նիստեր անել, ուստի կողմերն իրենց հանդիպումները նշանակելիս, սա պետք է հաշվի առնեն:
Հիշեցնենք, Երեւանի ընդհանուր իրավասության դատարանում, Աննա Դանիբեկյանի նախագահությամբ այսօր շարունակվում է ՀՀ երկրորդ նախագահ Ռոբերտ Քոչարյանի եւ մյուսների գործով դատական նիստը։
Կարդացեք նաև
ՀՀ նախկին փոխվարչապետ Արմեն Գևորգյանը նույնպես ցանկացավ հայտարարությամբ հանդես գալ: Դատավորը, թույլ չտվեց։ Արմեն Գեւորգյանը տեղից ռեպլիկ նետեց: Դատավորը զգուշացրեց`նման վարքագծի պարագայում Արմեն Գեւորգյանի նկատմամբ էլ սանկցիա կկիրառվի:
Նելլի ԳՐԻԳՈՐՅԱՆ
